Белорусский портал в Казахстане

МТЗ паставіць каля 500 трактароў ва Узбекістан больш як на $8 млн



Мінскі трактарны завод паставіць каля 500 трактароў BELARUS у адрас ТАА TEXAGRO-KLASTER (Узбекістан). Адпаведны кантракт падпісаны на палях беларуска-ўзбекскага жаночага бізнес-форуму. Сума здзелкі перавышае $8 млн, паведамілі ў прэс-службе прадпрыемства.

"Узбекістан з`яўляецца даўнім надзейным партнёрам Мінскага трактарнага завода. Для нас асабліва важна, што падпісанне кантракта на пастаўку трактароў BELARUS адбылося ў рамках такога маштабнага мерапрыемства, як беларуска-ўзбекскі жаночы бізнес-форум. Перакананы, што форум надасць новы імпульс развіццю ўзаемавыгадных адносін паміж Беларуссю і Узбекістанам", - сказаў генеральны дырэктар ААТ "МТЗ" Віталь Воўк.

Мінскі трактарны завод - адзін з буйнейшых вытворцаў сельскагаспадарчай тэхнікі. Заказчыкам прапануюць больш за 100 мадэлей трактароў больш як у 200 зборачных варыянтах для ўсіх кліматычных і эксплуатацыйных умоў. Новыя мадэлі маюць шырокія магчымасці агрэгатавання з сельгасмашынамі розных вытворцаў. МТЗ распрацоўвае, вырабляе і экспартуе колавыя трактары і запасныя часткі да іх, арганізуе на ліцэнзійнай аснове іх вытворчасць за мяжой, аказвае паслугі па наладжванні і правядзенні сэрвісу пастаўленых машын, праводзіць навучанне па эксплуатацыі і тэхнічным абслугоўванні выпускаемай тэхнікі.

6 верасня 2023, Мінск
БЕЛТА

Ссылка на текущий документ: http://belarus.kz/aktueller/10-408/1/70960
Текущая дата: 25.02.2024