Досвед Беларусі па арганізацыі электроннага біржавога гандлю лесапрадукцыяй на ўнутраным і знешнім рынках прадстаўлены на IX Міжнароднай канферэнцыі "Рынак лесасыравіны і прадукцыі дрэваапрацоўкі - 2024", якая праходзіць 21-22 кастрычніка ў Маскве.

Выступаючы ў рамках сесіі "Круглы лес і піламатэрыялы: вытворчасць, рэалізацыя, цэны", начальнік упраўлення знешнеэканамічнай дзейнасці БУТБ Аляксандр Башлій расказаў аб парадку і алгарытмах правядзення біржавых таргоў лесапрадукцыяй, найбольш запатрабаваных таварных пазіцыях, геаграфіі экспарту і асаблівасцях заключэння біржавых адрасных здзелак. Асобная ўвага была ўдзелена паказчыкам эфектыўнасці біржавога механізма, які забяспечвае справядлівае рыначнае цэнаўтварэнне, стымулюе развіццё канкурэнцыі і дае магчымасць у роўнай ступені захоўваць інтарэсы прадаўцоў і пакупнікоў.

"У аснове біржавых таргоў свабодная канкурэнцыя, якая дасягаецца шляхам канцэнтрацыі на біржавой пляцоўцы вялікай колькасці прадаўцоў і пакупнікоў рэсурсу. У выніку кошт тавару вызначаецца зыходзячы з бягучых суадносін попыту і прапанавання, што ў залежнасці ад прымяняемага алгарытму таргоў дае магчымасць альбо эканоміць на закупках, альбо атрымліваць дадатковую выручку ад рэалізацыі, - растлумачыў Аляксандр Башлій. - Так, паводле ацэнак аналітыкаў БУТБ, за дзевяць месяцаў бягучага года эканамічны эфект ад выкарыстання біржавых інструментаў беларускімі прадпрыемствамі лесапрамысловага комплексу склаў больш за $19 млн у эквіваленце".

Паводле даных БУТБ, у студзені - верасні 2024 года здзелкі па куплі лесапрадукцыі на біржавых таргах заключалі суб`екты гаспадарання 22 краін. Агульная сума біржавых кантрактаў за названы перыяд перасягнула $316 млн, што ў 2,5 раза больш, чым у студзені - верасні 2023 года. У тройку буйнейшых імпарцёраў увайшлі ўдзельнікі таргоў з Кітая, Азербайджана і Расіі.

21 кастрычніка 2024, Мінск
БЕЛТА