Пад лістом з адпаведным зваротам у адрас еўрапейскіх парламентарыяў падпісаліся прэзідэнт Эстонскай асацыяцыі малога і сярэдняга бізнесу (EVEA) Керсці Крачт, выканаўчы консул Мальтыйскай палаты малога і сярэдняга бізнесу (GRTU) Ноэл Гаўкт і дырэктар беларускага Бізнес-саюза прадпрымальнікаў і наймальнікаў імя прафесара Куняўскага Жанна Тарасевіч.

У звароце канстатуецца, што, нягледзячы на зняцце амаль усіх санкцый ЕС з Беларусі, абмежаванні на пастаўку тэкстылю з краіны дэ-факта застаюцца ў выглядзе квот і ліміту на памер аднаразовай пастаўкі. У прыватнасці, ліміт аб`ёму разавай пастаўкі (5 тыс. кг) прымяняецца да 11 запатрабаваных пазіцый тэкстыльных тавараў, такіх як жаночыя касцюмы, мужчынскія кашулі, пасцельная бялізна. Квоты тычацца 22 пазіцый, у тым ліку сінтэтычных, шарсцяных і паўшарсцяных тканін і пражы.

"Абмежаванні перашкаджаюць гандлю з ЕС, у тым ліку ліміт па аб`ёме разавай партыі тавараў негатыўна адбіваецца на лагістыцы паставак, павялічвае ўдзельныя выдаткі і адміністрацыйныя выдаткі бакоў здзелак", — гаворыцца ў заяве.

Аўтары ліста вітаюць падрыхтаваны праект рашэння Еўрапейскай камісіі аб адмене абмежаванняў на імпарт беларускага тэкстылю і выказваюць упэўненасць, што аператыўнае прыняцце такога рашэння паспрыяе ўмацаванню эканамічных адносін, як гэта прадугледжвае ініцыятыва "Усходняе партнёрства".

Марына Носава, БелаПАН
Мінск, 21 снежня 2016