На пасяджэнні Савета бяспекі 16 снежня кіраўнік дзяржавы чарговы раз зрабіў сур`ёзную заўвагу ўраду аб недахопах у рабоце па экспарце тавараў і паслуг, звярнуўшы ўвагу на неабходнасць пераарыентацыі на новыя рынкі, каб была паўнацэнная дыверсіфікацыя экспарту ў сувязі са спадам аб`ёмаў на расійскім рынку і рынку МС.

"За студзень-кастрычнік бягучага года па краінах Мытнага саюза мы "праселі" на $777 млн, у тым ліку па Расіі - на $739 млн, - адзначыў Міхаіл Мясніковіч. - Мы недабіраем вельмі вялікія аб`ёмы экспарту ў Расійскую Федэрацыю, нягледзячы на тое што ў фізічным вылічэнні практычна па ўсіх пазіцыях пастаўляем больш прадукцыі". Такі стан спраў уяўляе сур`ёзную пагрозу эканамічнай бяспецы рэспублікі. І хоць за кошт нарошчвання экспарту ў трэція краіны Беларусі ўдалося кампенсаваць $757 млн, гэтага, падкрэсліў Міхаіл Мясніковіч, недастаткова. "Неабходна прымаць самыя рашучыя дзеянні, каб актывізаваць экспарт у краіны па-за Мытным саюзам", - запатрабаваў ён.

Як адзначыў у сувязі з гэтым міністр замежных спраў Уладзімір Макей, адным з напрамкаў шматвектарнай палітыкі Беларусі з`яўляецца развіццё супрацоўніцтва з краінамі Паўднёвай Азіі, у прыватнасці з Бангладэш. Беларуска-бангладэшскі гандаль у 2013 годзе склаў $133,3 млн, у тым ліку беларускі экспарт дасягнуў $115,4 млн. Яго аснову складаюць калійныя ўгнаенні (99,4 працэнта). У студзені-верасні бягучага года двухбаковы тавараабарот склаў $63 млн, экспарт у Бангладэш - $43,12 млн. Забяспечана дадатнае сальда ў памеры $23,2 млн. "Бангладэш уяўляе для Беларусі цікавасць як рынак збыту калійных угнаенняў, прадукцыі машынабудавання, а таксама паслуг у сферы адукацыі, - адзначыў кіраўнік МЗС. - Па выніках бягучага года Беларуская калійная кампанія плануе паставіць у Бангладэш каля 212 тыс.т хлорыстага калію пры прагнозе 200 тыс.т".

Важнейшым праектам, які знаходзіцца на кантролі ўрада і МЗС, з`яўляецца арганізацыя паставак у Бангладэш тэхнікі "Амкадор" і МАЗ з выкарыстаннем механізма падтрымкі экспарту. Таксама бакі прадаўжаюць працаваць над арганізацыяй правядзення першага пасяджэння сумеснай беларуска-бангладэшскай камісіі па гандлёвым і эканамічным супрацоўніцтве. Папярэдне мерапрыемства запланавана на першы квартал 2015 года.

У цэлым жа, прадаўжаючы тэму дыверсіфікацыі рынкаў збыту, Уладзімір Макей адзначыў: "Не толькі кіраўніцтва краіны, МЗС адказваюць за дыверсіфікацыю экспарту - гэта залежыць ад кожнага міністэрства, кожнага прадпрыемства. Без настойлівага імкнення кожнага ведамства мы не дасягнём пастаўленых мэт". Пры гэтым работа ў такім напрамку, падкрэсліў міністр, павінна весціся пастаянна, а не толькі ў выпадку ўзнікнення якой-небудзь крызіснай сітуацыі.

16 снежня 2014, Мінск
Таццяна Грыгаровіч - БЕЛТА