Аляксандр Лукашэнка павіншаваў нацыянальную каманду з паспяховым выступленнем на чэмпіянаце Еўропы 2019 года, які праходзіў у Батумі. Заваявана 19 медалёў, з іх восем у дваябор`і, другое месца ў агульнакамандным заліку. "Проста малайцы!" - пахваліў Прэзідэнт.

Кіраўнік дзяржавы прызнаўся, што з-за вялікай занятасці і няхваткі часу рэдка сочыць за спаборніцтвамі па цяжкай атлетыцы. Тым не менш нядаўні чэмпіянат Еўропы ў Батумі дзякуючы выступленню беларускіх спартсменаў паглядзеў практычна поўнасцю. "Таму што вы - малайцы, вы выйгравалі, вы змагаліся. Самае галоўнае, што змагаліся і ў вас амаль не было няўдач. Трэнеры - малайцы. Яны дакладна планавалі падыходы кожнага спартсмена, ведалі, на што здольны спартсмен. Не скажу, што на 100 працэнтаў вынік паказалі, але блізка да гэтага", - сказаў Аляксандр Лукашэнка.

Прэзідэнт падкрэсліў асаблівую каштоўнасць паспяховага выступлення цяжкаатлетаў на фоне няўдач спартсменаў у іншых відах спорту. "Шчыра кажучы, вельмі мала радасці прыносіць апошнім часам спорт беларусам, - заўважыў ён. - Але цяжкая атлетыка ўваходзіць у каралі тых відаў спорту, якія прыносяць славу. Гэта вялікі від спорту".

Кіраўнік дзяржавы звярнуў увагу, што ў цяжкай атлетыцы выніку можна дабіцца толькі цаной велізарных намаганняў. "Ваш від спорту - гэта страшэнна цяжкі від спорту, самы цяжкі від спорту, такі нудны, дзе трэба пастаянна змагацца. Добра змагацца ў гульнявых відах спорту, гэта цікава, дынамічна. Але калі ты пастаянна змагаешся з сабой і штангай... І так кожны дзень. Гэта вельмі цяжкі від спорту", - выказаў меркаванне Прэзідэнт. Ён расказаў, што сам у мінулым спрабаваў займацца цяжкай атлетыкай, але пакінуў гэту спартыўную дысцыпліну. "Шчыра кажучы, гэта не мой від спорту", - прызнаўся Аляксандр Лукашэнка.

Тым не менш Прэзідэнт, безумоўна, сочыць за выступленнямі спартсменаў і ў якасці балельшчыка, і з пункту гледжання кіраўніка, ацэньваючы вынік работы спартыўнай галіны. "Мне на чэмпіянаце Еўропы ўсё спадабалася, малайцы. Але планку ўзнялі высока. Трэнеры перакрэслілі ўсе свае няўдачы", - сказаў кіраўнік дзяржавы. Ён падкрэсліў, што вельмі патрабавальна ставіцца да трэнераў і тых службовых асоб, якія курыруюць тыя ці іншыя спартыўныя дысцыпліны. "Кожнаму віду спорту патрэбна ўвага. Не ўтойваю, патрэбны пэўны адміністрацыйны рэсурс. Трэба стварыць умовы. На жаль, ні ў адной краіне, не толькі ў нас, без гэтага рэсурсу не абысціся", - дадаў Аляксандр Лукашэнка.

Гаворачы аб сваіх асабістых уражаннях ад прагляду чэмпіянату Еўропы, Прэзідэнт звярнуў увагу на атмасферу ў час цырымоніі ўзнагароджання і моцныя патрыятычныя пачуцці, з якімі беларускія спартсмены паднімаліся на п`едэстал. "Спартсмены, калі бяруць сцяг, адчуваецца, што гэта ўжо беларусы, - падкрэсліў кіраўнік дзяржавы. - Трэнеры ўзялі ўсё лепшае, што было ў нашай вялікай краіне (Савецкім Саюзе.), і выхавалі сваіх. Ужо адчуваецца, што гэта выходзіць беларус, народжаны ў суверэннай незалежнай Беларусі".

Нацыянальная каманда цяжкаатлетаў, сапраўды, складаецца выключна з грамадзян Беларусі, у ёй няма легіянераў - замежных спартсменаў, якія выступаюць за іншую дзяржаву. Больш таго, адсутнічае неабходнасць запрашаць кагосьці з-за мяжы, паколькі ў цяжкай атлетыцы наладжана эфектыўная сістэма пошуку, адбору і падрыхтоўкі спартсменаў. Здольных падлеткаў трэнеры адбіраюць па ўсіх рэгіёнах краіны і выхоўваюць з іх спартсменаў высокага класа. Вельмі важна, што пры гэтым захоўваецца пераемнасць: больш вопытныя цяжкаатлеты перадаюць веды маладому пакаленню.

За прафесійнае майстэрства, вялікі асабісты ўклад у падрыхтоўку спартсменаў высокага класа, значныя спартыўныя дасягненні Прэзідэнт узнагародзіў медалём "За працоўныя заслугі" старшага трэнера-выкладчыка па цяжкай атлетыцы рэспубліканскага цэнтра алімпійскай падрыхтоўкі "Стайкі" Валерыя Сізянка. Дыплом аб прысваенні звання "Заслужаны майстар спорту Рэспублікі Беларусь" Аляксандр Лукашэнка ўручыў цяжкаатлетцы Дар`і Навумавай. Падзяка Прэзідэнта аб`яўлена членам нацыянальнай каманды па цяжкай атлетыцы за паспяховае выступленне на чэмпіянаце Еўропы - галоўным трэнерам Валянціну Кароткіну і Віктару Шаршукову, а таксама спартсменам-інструктарам Генадзю Лапцеву і Яўгену Ціханцову.

Пасля ўручэння ўзнагарод і аб`яўлення падзяк Аляксандр Лукашэнка паразмаўляў са спартсменамі і трэнерамі, абмеркаваўшы з імі бягучыя пытанні ў цяжкай атлетыцы, развіццё гэтага віду спорту ў краіне і планы на будучыя старты. Асобная ўвага была звернута на ўдзел беларускіх атлетаў у Алімпійскіх гульнях 2020 года, якія пройдуць у Токіа. "Галоўнае, каб больш спартсменаў паехалі на Алімпіяду. Хацелася б пачуць, як тут ідуць справы", - сказаў Прэзідэнт.

Закраналася таксама тэма аб`ектыўнасці судзейскіх ацэнак на міжнародных спаборніцтвах. Адзначалася, што нават у такіх відах спорту, як цяжкая атлетыка, дзе вынік спартсмена здаецца відавочным, прысутнічае суб`ектывізм суддзяў і прадузятае стаўленне. Таму Прэзідэнт нацэліў перш за ўсё трэнерскі склад на адстойванне інтарэсаў кожнага спартсмена, барацьбу за справядлівы падыход да ўсіх удзельнікаў спаборніцтваў.

Размова кіраўніка дзяржавы з трэнерамі і спартсменамі прадоўжылася ў фармаце чаяпіцця. Улічваючы спецыфіку спартыўнага рэжыму і харчавання цяжкаатлетаў, ім былі прапанаваны не толькі кандытарскія вырабы, але і традыцыйныя беларускія стравы, напрыклад, сала і хлеб, прыгатаваныя па фірменных рэцэптах.

"Вельмі смачна і пікантна, - падзяліўся ўражаннямі з журналістамі пасля прыёму ў кіраўніка дзяржавы трэнер каманды Валерый Сізянок. - Для нашага віду спорту яно вельмі карысна. Гэта рэкамендацыя цяжкаатлета - ужываць гэты прадукт". Паводле яго слоў, сустрэча прайшла ў дружалюбнай і цёплай абстаноўцы, Прэзідэнт удзяліў увагу кожнаму спартсмену, абмяркоўваліся і праблемныя пытанні ў цяжкай атлетыцы, і поспехі беларускіх атлетаў.

Перад сустрэчай з кіраўніком дзяржавы для членаў нацыянальнай каманды была арганізавана экскурсія па Палацы Незалежнасці.

23 красавіка 2019, Мінск
БЕЛТА