Талісман гульняў набыў сёння білеты на цырымонію адкрыцця мультыспартыўнай падзеі, якая пройдзе 21 чэрвеня 2019 года на мінскім стадыёне "Дынама".

Білеты адрозніваюцца арыгінальным дызайнам і рознымі ступенямі аховы.

Як адзначыў начальнік упраўлення па маркетынгу, камерцыйных пытаннях і рэкламе фонду "Дырэкцыя II Еўрапейскіх гульняў 2019 года" Максім Кашкалда, у сучасным свеце больш папулярны анлайн-продажы, але білеты на наступныя старты можна будзе набыць і ў касах "Цікетпро" па ўсёй Беларусі.

II Еўрапейскія гульні пройдуць у Мінску з 21 па 30 чэрвеня 2019 года на 12 спартыўных аб`ектах. Больш за 4 тыс. атлетаў з 50 краін разыграюць 200 камплектаў узнагарод у 15 відах спорту.

Спаборніцтвы ў дзевяці відах стануць кваліфікацыйнымі да XXXII Алімпійскіх гульняў 2020 года ў Токіа. Спаборніцтвы па бадмінтоне, боксе, веславанні на байдарках і каноэ і дзюдо пройдуць у рангу чэмпіянатаў Еўропы.

19 снежня 2018, Мінск
БЕЛТА