2 ліпеня нашы спартсмены заваявалі шэсць залатых, адну срэбную і пяць бронзавых узнагарод. Палову медалёў дня прынеслі лёгкаатлеты. У скачках у даўжыню ў хлопцаў абодва верхнія радкі засталіся за беларусамі: перамог Павел Арцем’еў, услед за ім размясціўся Станіслаў Стемасов. У бегу на 400 м з бар’ерамі не было роўных Кацярыне Новік, а на дыстанцыі 3000 м бронзу заваяваў Уладзіслаў Кавалюк.

Залаты дубль нашы спартсмены аформілі ў эстафетах 4×100 м. У забегу дзяўчат першынстваваў квартэт у складзе Валерыі Мураўскай, Нікі Пятроўскай, Дамінікі Кель і Ганны Арлоўскай, а ў юнакоў лепшы вынік паказалі Андрэй Літвіновіч, Іван Шылец, Ілья Карэба і Ягор Бярэшка.

Таксама сёння завяршыліся спаборніцтвы па баскетболе 3×3, абодва камплекты ўзнагарод вышэйшай пробы выйгралі зборныя Беларусі-U16. У фінале ў дзяўчат Марта Галавач, Алеся Талькоўская, Дар’я Кулік і Ульяна Палей абыгралі каманду Уральскай федэральнай акругі з лікам 14:9, а ў паядынку за чэмпіёнства ў хлопцаў нашы Ілья Баранаў, Іван Катоўскі, Яраслаў Гесць і Алег Салей былі мацнейшымі за аднагодкаў з Узбекістана. (11:5).

Яшчэ тры медалі былі заваяваны ў дзюдо. Максім Строкун (да 81 кг), Эліна Грамыка (да 63 кг) і Дар’я Плескацэвіч (да 70 кг) дайшлі да паўфіналаў у сваіх катэгорыях, дзе пацярпелі паражэнне. Паколькі схваткі за трэція месцы ў гэтых вагах не былі прадугледжаны, беларусы сталі ўладальнікамі бронзавых узнагарод.

Першым медалём Гульняў «Дзеці Азіі» разжылася наша каманда па боксе — Дар’я Свілёнак заняла трэцяе месца ў катэгорыі да 57 кг пасля няўдачы ў паўфінале. Таксама 2 ліпеня на рынг выходзілі трое нашых хлопцаў, але прайсці чвэрцьфінальную стадыю ім не ўдалося. У барацьбе за ўзнагароды застаюцца яшчэ двое беларусаў — Сяргей Заяц (да 50 кг) і Захар Шарановіч (да 75 кг) свае паядынкі адной другой правядуць у сераду.

Акрамя таго, сёння былі разыграны медалі ў кулявой стральбе сярод змешаных пар, беларускія дуэты ў стральбе з пнеўматычных вінтоўкі і пісталета занялі сёмыя месцы. Таксама ў аўторак выступленні на Гульнях пачалі лучнікі, у першы дзень адбыліся кваліфікацыйныя спаборніцтвы. Па іх выніках усе нашы ўдзельнікі ў асабістым першынстве, а таксама ў камандным і змешаным турніры прадоўжаць барацьбу за праход далей заўтра.

Такім чынам, пасля тыдня спаборніцтваў у Якуцку беларуская дэлегацыя выйшла на першую пазіцыю ў медальным заліку сярод 30 зборных: у актыве нашай каманды 67 узнагарод (22 залатыя, 21 срэбная і 24 бронзавыя). VIII Міжнародныя гульні «Дзеці Азіі» працягнуцца да 6 ліпеня.

Звязда, 2 ліпеня 2024