Удзел у забегу ў Мінску прынялі паўтары тысячы чалавек з сямі краін: Беларусі, Расіі, Азербайджана, Балгарыі, Казахстана, Кітая і Егіпта. На самай прэстыжнай дыстанцыі ў 21,1 км у мужчын лепшым стаў вядомы беларускі марафонец, прызёр міжнародных стартаў Уладзіслаў Прамаў. Пераможца паказаў час 1 гадзіну, 8 мін 54 сек. і на чатыры з паловай хвіліны апярэдзіў Аляксандра Васілевіча, які стаў другім. Тройку наймацнейшых замкнуў Віталь Саскавец.

На аналагічнай дыстанцыі ў жанчын раней за іншых фінішную рысу перасекла ўдзельніца Алімпійскіх гульняў і чэмпіёнка Мінскага паўмарафона 2023 года Марына Даманцэвіч. Яе вынік склаў 1: 21: 06, што больш чым на тры хвіліны хутчэй за паказчык срэбнай медалісткі Ганны Максімавай. Трэцяе месца заняла Ганна Дронь.

Маршруты забегаў у 1 км, 5 км, 10 км і 21,1 км былі пракладзены па праспекце Пераможцаў уздоўж знакавых славутасцяў сталіцы. У гэты ж дзень старт Міжнароднаму паўмарафону One Run быў дадзены яшчэ ў 15 краінах свету — удзельнікамі забегу сталі рэзідэнты Расіі, Арменіі, Узбекістана, Кыргызстана, Кітая, Бразіліі, Егіпта, Сербіі, Бахрэйна, Катара, Камеруна, ААЭ, Непала, Пакістана і Таджыкістана.

Звязда, 19 траўня 2024