Мінскі хакейны клуб "Дынама" ўвайшоў у тройку лідараў па індэксе сілы каманд Кантынентальнай хакейнай лігі, паведамілі ў афіцыйным Telegram-канале КХЛ.

Як растлумачылі ў прэс-службе лігі, індэкс сілы – гэта рэйтынг, які падлічваецца матэматычна на аснове паказчыкаў у бягучым сезоне. Ён паказвае, якія каманды зараз знаходзяцца "на хаду", абыгрываюць фаварытаў і выдаюць працяглыя пераможныя серыі.

Першае месца ў гэтым рэйтынгу займае маскоўскі клуб ЦСКА. "Зубры" за апошні час здолелі падняцца на два радкі і зараз займаюць другое месца, тройку лідараў завяршае магнітагорскі "Металург".

Цяпер падапечныя Дзмітрыя Квартальнава займаюць шостае месца ў турнірнай табліцы Заходняй канферэнцыі. На рахунку ў "Дынама" 49 балаў пасля 40 праведзеных гульняў у сёлетнім сезоне.

У агульнай табліцы чэмпіянату мінская каманда займае 10-ы радок сярод 23 каманд.

Найбліжэйшы матч "Дынама-Мінск" правядзе 4 студзеня на выездзе супраць ніжагародскага "Торпедо".

Затым пачнецца серыя хатніх гульняў: 6 студзеня мінчане зноў згуляюць супраць "Торпедо", 7 студзеня – супраць маскоўскага ЦСКА, а 10 студзеня "зубры" прымуць на дамашнім лёдзе хакеістаў "Сибири".

Мінск, 31 снежня 2024
Sputnik