Беларускі канькабежац Віталь Міхайлаў заняў першае месца ў масстарце на этапе Кубка свету, які праходзіць у японскім горадзе Тамакамай. Міхайлаў набраў 120 балаў, апярэдзіўшы бліжэйшага канкурэнта, спартсмена з Паўднёвай Карэі Ум Чэн Хо на 12 балаў.

Міхайлаў спрабуе сілы ў масстарце трэці год. На алімпіядзе ў Пхенчхане ён змог выйсці ў фінал і стаў сёмым. Тады ён казаў, што сёмае месца ў мас-старце на Алімпіядзе для яго з`яўляецца лепшым асабістым вынікам у сезоне.

Спартсмену 32 гады, ён родам з Віцебска. З`яўляецца шматразовым чэмпіёнам і рэкардсменам Беларусі. Неаднаразова прымаў удзел у чэмпіянатах Еўропы і свету, але прызавыя месцы да гэтага часу не займаў.

Яшчэ адзін прадстаўнік Беларусі Аляксей Кірпічнік, набраўшы 76 балаў, заняў шостае месца.

Sputnik
Мінск, 24 лістапада 2018