Вячэрняя праграма чацвярга на ЧЕ поўнасцю была прысвечана розыгрышу ўзнагарод у жаночай барацьбе, з беларускай каманды да гэтай медальнай схваткі напярэдадні дайшла толькі Алеся Гетманава. У вазе да 59 кг наша спартсменка стартавала з перамогі над Эдай Тэкін з Турцыі, але ў чвэрцьфінале ўступіла ўкраінцы Аліне Філіповіч. Тым не менш дзякуючы далейшаму выхаду саперніцы ў фінал Гетманава непасрэдна прайшла ў паядынак за трэцяе месца.

У медальнай спрэчцы беларусцы павінна была процістаяць Настасся Нічыта, але малдаванка атрымала траўму ў час схватак і з паядынку знялася. Такім чынам, Гетманава стала ўладальніцай бронзы чэмпіянату Еўропы, таксама ў сваёй кар`еры Алеся станавілася чэмпіёнкай свету сярод юніёраў і пераможцай II Гульняў краін СНД.

Пасля чатырох дзён спаборніцтваў у Румыніі ў актыве нашай каманды ўжо тры медалі: раней бронзавымі прызёрамі ў грэка-рымлян сталі Кірыл Маскевіч і Абубакар Хаслаханаў. Сёння на кантынентальным форуме ў Бухарэсце за ўзнагароды будуць змагацца адразу чатыры прадстаўніцы Беларусі. Ванэса Каладзінская ў вазе да 53 кг і Ірына Курачкіна ў катэгорыі да 57 кг пазмагаюцца за золата, а Вераніка Іванова (да 62 кг) і Вікторыя Радзькова (да 72 кг) паспрачаюцца за бронзу. Таксама 16 лютага на турніры стартуюць барцы вольнага стылю.

16 лютага 2024, Мінск
БЕЛТА