V міжнародная спецыялізаваная канферэнцыя "Аграэкатурызм 2015: інавацыі і тэрытарыяльнае развіццё" адбудзецца 19—20 лістапада ў межах Сусветнага тыдня прадпрымальніцтва ў Беларусі. 

Як паведамляе прэс-служба "Белаграпрамбанка", мэтай мерапрыемства з`яўляецца папулярызацыя і падтрымка айчыннага сельскага турызму. Айчынныя і замежныя эксперты абмяркуюць найболей значныя аспекты развіцця аграэкатурызму, абмяняюцца вопытам і выпрацуюць новыя ідэі. 

У канферэнцыі возьмуць удзел гаспадары сельскіх сядзіб, прадстаўнікі рэспубліканскіх і мясцовых органаў дзяржаўнага кіравання, пасольстваў, СМІ, замежныя эксперты і госці. 

Акрамя таго, адбудзецца прэзентацыя новага каталога сельскіх сядзіб, які традыцыйна выдаецца "Белаграпрамбанкам". А ў фінале канферэнцыі стануць вядомыя пераможцы і ўладальнік Гран-пры рэспубліканскага конкурсу ААТ "Белаграпрамбанк" "Лепшая аграэкасядзіба 2014 года".

Аляксей Арэшка, БелаПАН
Мінск, 14 лістапада 2015