Невялікі гарадскі пасёлак Радунь Воранаўскага раёна неўзабаве ператворыцца ў цэнтр рэлігійнага паломніцтва. Ізраільская фірма пачала будаваць тут турыстычны цэнтр, у які плануе ўкласці каля 10 мільёнаў долараў, а беларускі бок абяцае арганізаваць для турыстаў чартарныя рэйсы з ЗША, Ізраіля і Еўропы.

Месцам прыцягнення турыстаў Радунь стаў усяго некалькі гадоў таму, калі тут адшукалі дакладнае месца размяшчэння магілы духоўнага лідара габрэйскага народа Хафеца Хаіма.

Як распавёў намеснік старшыні па пытаннях развіцця сацыяльнай сферы Воранаўскага райвыканкама Андрэй Карповіч, пасля гэтага ізраільскія паломнікі сталі прыязджаць сотнямі, але ім не было дзе спыніцца на начлег, паабедаць і правесці час. Многія адмыслова прыляталі ў Вільню, спыняліся там на начлег, а ў беларускую Радунь прыязджалі толькі на некалькі гадзін.

Выправіць сітуацыю вырашыў ізраільскі бізнесмен Авраам Сасі, які вырашыў удыхнуць жыццё ў беларускае мястэчка, якое карыстаецца вялікай папулярнасцю ў Ізраілі. Асабліва шмат паломнікаў збіраецца ў Радуні ў пачатку верасня, калі адзначаецца гадавіна смерці рабіна. Па юдэйскім павер`і, у гэтыя дні душа Хафеца Хаіма спускаецца на зямлю і дапамагае тым, хто наведае ў гэтыя дні месца яго пахавання.

З кожным годам у Радунь прыязджае ўсё больш паломнікаў з розных куткоў свету. Улічваючы прыток турыстаў, разглядаецца пытанне, каб арганізаваць чартэрныя рэйсы з ЗША, Еўропы і Ізраіля ў Беларусь.

У невялікім пасёлку ўжо пачалі будаваць уласны турыстычны цэнтр, які будзе прымаць тысячы паломнікаў з усяго свету. Паводле слоў Карповіча, на тэрыторыі плошчай каля 3 гектараў, якая размяшчаецца побач са старымі яўрэйскімі могілкамі, з`явяцца два рэстараны кашэрнага харчавання на 200 месцаў кожны, сінагога умяшчальнасцю 300 мужчын і 50 жанчын, міквы — рытуальнае месца для абмыванняў, VIP-домікі для гасцей, гасцінічны комплекс на 800 месцаў з канферэнц-залай, прэс-цэнтрам і пакоямі перамоў.

Плануецца рэстаўраваць мясцовыя яўрэйскія могілкі, магілу рабіна Хафеца Хаіма, а таксама вярнуць ранейшае аблічча і статус будынку, у якім у гады жыцця Хафеца Хаіма размяшчалася Ешыбот — рэлігійны інстытут, заснаваны вядомым філосафам. Гэты будынак захаваўся, шмат гадоў тут размяшчаўся радуньский Дом культуры. А каб гарадзкі пасёлак не застаўся без свецкага жыцця, ізраільскі інвестар возьмецца рэканструяваць мясцовую школу пад ДК. Будаўніцтва павінна завяршыцца да 2020 года. Сума інвестыцый складзе больш за 9,5 мільёнаў долараў.

Хафец Хаім — равін, філосаф, духоўны лідар яўэйства. Яго працы вядомыя нават ізраільскім школьнікам. З заснаванага ім у Радуні рэлігійнага інстытута выйшлі 12 самых вядомых у свеце рабінаў. Хафец Хаім памёр ў 1933 годзе і быў пахаваны на могілках на ўскраіне Радуні, але яны ў час вайны былі практычна знішчаны, таму пахаванне доўга не маглі адшукаць.

Іна Грышук, Гродна
Sputnik, 24 верасня 2018