5 жніўня ў Бэрліне паліцыя затрымала двух турыстаў з Кітая. Яны фатаграфавалі адзін аднаго на фоне будынка Рэйхстага, дэманструючы пры гэтым нацысцкае прывітаньне ў форме выкінутай уверх правай рукі.

Пра гэта паліцыі паведамілі ахоўнікі будынка, у якім засядае нямецкі парлямэнт — Бундэстаг. Турыстаў, аднаму з якіх 36 гадоў, а другому — 49, адпусьцілі з-пад варты пасьля ўнясеньня кожным з іх закладу ў памеры 500 эўра.

Супраць абодвух распачалі крымінальную справу за выкарыстаньне сымболікі антыканстытуцыйных арганізацый.

У Нямеччыне выкарыстаньне нацысцкай сымболікі забаронена Крымінальным кодэксам. Да такой сымболікі адносяцца сьцягі, значкі, асобныя прадметы ўніформы, лёзунгі, формы прывітаньня і іншае.

Радыё Свабода, 6 жніўня 2017