Беларуская спартсменка Дзіна Сазанавец стала пераможцай чэмпіянату Еўропы-2015 па цяжкай атлетыцы ў суме дваябор`я ў вагавой катэгорыі да 69 кг на кантынентальным форуме, што праходзіць у грузінскім Тбілісі. 

Рэзультат Дзіны Сазанавец у суме дваябор`я - 255 кг. У рыўку спартсменка падняла 115 кг. Затым у штуршку яна справілася са штангай вагой 140 кг. Ніхто з саперніц не змог апярэдзіць яе па суме двух рухаў, прычым у кожным з іх беларуска заваявала малыя залатыя ўзнагароды. За крок ад п`едэстала ў дваябор`і спынілася яшчэ адна беларуская цяжкаатлетка Марына Шкерманкова, якая заняла 4-е месца з сумай 232 кг (103 кг у рыўку + 129 кг у штуршку). Гэтага рэзультату спартсменка дабілася пасля перапынку ў выступленнях на топ-спаборніцтвах.

Прызёрамі цяперашняга кантынентальнага турніру ў дваябор`і адпаведна сталі расіянка Яна Кандрашова 235 кг (105 кг+130 кг) і азербайджанка Настасся Ібрагімлі - 233 кг (103 кг+130 кг).

Што ж датычыцца Дзіны Сазанавец, то для яе ўзнагарода чэмпіянату Еўропы стала сумарна трэцяй. Акрамя двух залатых медалёў (2014, 2015 гады) яна заваёўвала серабро "дарослага" еўра ў 2013-м. Ёсць у яе калекцыі і бронза чэмпіянату свету-2013 у дваябор`і. Спаборніцтвы ў Тбілісі Дзіна Сазанавец выйграла з большай сумай, чым мінулагоднія ў ізраільскім Тэль-Авіве. Тады яна стала наймацнейшай з рэзультатам 245 кг (115 кг+130 кг). Цікава, што серабро ЧЕ-2013 у албанскай Тыране яна ўзяла з сумай 252 кг (112 кг+140 кг). Усе гэтыя медалі спартсменка заваёўвала ў сваёй кароннай катэгорыі да 69 кг. На сусветным чэмпіянаце 2013 года ў польскім Вроцлаве вялікую бронзу яна атрымала з рэзультатам дваябор`я 259 кг (116 кг+143 кг), а сума 260 кг (117 кг+143 кг) не дазволіла спартсменцы ўвайсці ў лік прызёраў ЧС-2014 у казахстанскім Алматы, і яна засталася 4-й, пабіўшы асабісты рэкорд дваябор`я.

16 красавіка 2015, Мінск
БЕЛТА