Да акцыі далучыліся больш за 70 чалавек. Гэта работнікі сферы адукацыі і навукі, навучэнцы і студэнты з Брэста і Брэсцкага раёна.

«Мы павінны заўсёды памятаць, якую дарагую цану заплаціў беларускі народ для таго, каб мы маглі жыць, працаваць у мірнай, свабоднай краіне. І мы павінны зрабіць усё магчымае, каб наша краіна паспяхова развівалася. Мы павінны быць адзіныя. У адзінстве наша сіла і залог нашых будучых дасягненняў. Дзякуючы велапрабегу "дарогамі памяці" пастараліся з’яднаць розныя пакаленні, асабліва актыўная моладзь. Напярэдадні Дня народнага адзінства вырашылі такой акцыяй далучыцца да гэтага свята», — адзначыў Старшыня Брэсцкай абласной арганізацыі Беларускага прафесійнага саюза работнікаў адукацыі і навукі Іван Васіленка.

Стартаваў велапрабег у мемарыяльным комплексе «Брэсцкая крэпасць-герой». Удзельнікі ўсклалі кветкі да Вечнага агню і ўшанавалі памяць абаронцаў Айчыны хвілінай маўчання.

Наступным пунктам у маршруце стала месца, дзе размяшчаўся лагер для ваеннапалонных «Рэвыр». Нямецкія акупанты там замучылі не менш за 15 тыс.чалавек. Наведалі веласіпедысты таксама V форт.

Удзельнікі маюць намер зноў арганізаваць такую акцыю напярэдадні 17 верасня 2025 года. Маршрут падбяруць іншы, каб убачыць іншыя знакавыя месцы Брэсцкай вобласці.

Звязда, 14 верасня 2024