Белорусский портал в Казахстане

Сістэма прасочвальнасці тавараў можа запрацаваць у Беларусі ў 2020 годзе



Міністэрства па падатках і зборах падрыхтавала праект указа "Аб стварэнні сістэмы прасочвальнасці тавараў".

Сістэма прасочвальнасці тавараў можа запрацаваць у Беларусі ў 2020 годзе. Плануецца, што ў бліжэйшы час ён будзе размешчаны на Прававым форуме для публічнага абмеркавання, паведамілі ў МПЗ.

Дакумент распрацоўваўся ў мэтах прыняцця дадатковых мер па развіцці ў рэспубліцы электроннага дакументаабароту, прадухіленні шэрага імпарту тавараў, павышэнні празрыстасці руху тавараў на тэрыторыі краіны і за яе межы, а таксама рэалізацыі выканання Беларуссю асобных абавязацельстваў, закладзеных у праекце пагаднення аб механізме прасочвальнасці тавараў, увезеных на мытную тэрыторыю Еўразійскага эканамічнага саюза.

"На працягу апошніх гадоў дзяржавы - члены ЕАЭС рэалізуюць розныя лічбавыя праекты, накіраваныя на павышэнне празрыстасці таварных патокаў, але праблема шэрага рынку застаецца актуальнай для ўсіх удзельнікаў саюза. Значны аб`ём кантрафактнай прадукцыі наносіць вялікі ўрон эканомікам удзельнікаў ЕАЭС, легальнаму бізнесу і здароўю насельніцтва. Асобныя дзяржавы - члены Еўразійскага эканамічнага саюза пры ўвозе тавараў з-за яго меж прымяняюць паніжаныя стаўкі мытных пошлін", - канстатуюць у ведамстве.

Механізм прасочвальнасці, што прадугледжваецца праектам пагаднення і канкрэтызаваны ў праекце ўказа, уводзіцца з мэтай пацвярджэння законнасці абароту тавараў, якія перамяшчаюцца ва ўзаемным гандлі паміж дзяржавамі - членамі ЕАЭС. За кошт укаранення прасочвальнасці прадугледжваецца стварыць умовы, якiя выключаюць выкарыстанне суб`ектамі гаспадарання розных схем ухілення ад выплаты мытных і падатковых плацяжоў, уключэння тавараў у нелегальны абарот.

Як адзначаюць у МПЗ, адсутнасць у Беларусі сістэмы прасочвальнасці тавараў можа прывесці да немагчымасці экспарту на тэрыторыю іншых краін ЕАЭС беларускіх тавараў пры ўвядзенні імі механізма прасочвальнасці ў аднабаковым парадку.

Сістэма прасочвальнасці будзе стварацца на базе таварна-транспартных і таварных накладных у выглядзе электронных дакументаў. "Асаблівасцю складання электронных накладных з`яўляецца тое, што гэты дакумент інтэграваны ў бізнес-асяроддзе і з`яўляецца адным з дзеючых элементаў электроннага ўзаемадзеяння пакупніка (атрымальніка) і прадаўца (пастаўшчыка), - растлумачылі ў МПЗ. - Суб`екты гаспадарання могуць фарміраваць і перадаваць праз EDI-сістэму аператара любыя іншыя юрыдычна значныя дакументы і дакументы свабоднай формы (дагаворы, акты зверкі, электронныя прайс-лісты, пратаколы ўзгаднення цаны і інш.), што ў перспектыве можа садзейнічаць развіццю міждзяржаўнага электроннага гандлю і міждзяржаўнаму ўзаемадзеянню ў ЕАЭС".

12 сакавіка 2019, Мінск
БЕЛТА

Ссылка на текущий документ: http://belarus.kz/aktueller/13-408/1/47183
Текущая дата: 29.03.2024