З пачаткам новага навучальнага года ва ўстановах агульнай сярэдняй адукацыі ўвялі адзіны элемент у адзенні школьнікаў. Мяркуецца, што ён дапоўніць рэкамендаваны ў папярэднія гады дзелавы стыль вучняў. У сувязі з узнікаючымі спрэчнымі момантамі адносна вучнёўскага дрэс-кода Міністэрства адукацыі яшчэ раз растлумачыла пазіцыю па гэтым пытанні.

"Блузкі, кашулі, штаны, пінжакі і іншае школьнае адзенне можа быць рознай каляровай гамы, галоўнае - выконваць дзелавы стыль", - падкрэслілі ў прэс-службе Міністэрства адукацыі.

Як расказалі ў ведамстве, у дрэс-код вучня ўкладваюцца калекцыі адзення, прадстаўленыя ў спецыялізаваных аддзелах магазінаў, на школьных кірмашах, прыклады школьнай формы можна паглядзець у тым ліку і на сайце Міністэрства адукацыі. "У школьным стандарце прапісана, што адзенне вучня павінна адпавядаць дзелавому стылю. Ніякіх строгіх абмежаванняў там няма. І па сутнасці нават адсутнасць адзінага школьнага элемента, ружовая блузка ці нешта яшчэ ніяк не ўплываюць на допуск дзіцяці да вучэбных заняткаў", - адзначылі ў ведамстве.

"З гэтага навучальнага года Міністэрствам адукацыі было рэкамендавана ўвесці адзіны элемент школьнай формы для ўстаноў агульнай сярэдняй адукацыі. Што такое адзіны элемент школьнай формы? Мы прапаноўвалі каталог, з якога кожная школа магла выбраць свой элемент. Нехта выбраў гальштук, нехта - жакет, нехта - камізэльку. Калі бацькі па нейкіх прычынах не паспелі набыць для свайго дзіцяці гэты адзіны элемент школьнай формы (ім позна паведамілі, не знайшлі ў магазіне патрэбную мадэль або памер), нічога страшнага. Гэта не значыць, што такога вучня нельга дапускаць да заняткаў", - падкрэслілі ў прэс-службе Міністэрства адукацыі.

8 верасня 2022, Мінск
БЕЛТА