У некаторых школах Беларусі адкрыюць авіяцыйныя класы, пра гэта паведамілі ў Беларускай дзяржаўнай акадэміі авіяцыі.

Плануецца, што першапачаткова такі клас адкрыецца ў новай СШ №226, якая знаходзіцца ў раёне былога аэрапорта Мінск-1.

Месцазнаходжанне навучальнай установы, па сутнасці, стала вызначальным для выбару профілю.

У планах таксама адкрыць такі профіль у ДУА "Сярэдняя школа №46 г. Мінска". Пасля, магчыма, авіяцыйныя класы адкрыюцца і ў іншых школах.

Стаць навучэнцамі профільнага класа змогуць старшакласнікі, яны будуць вывучаць на павышаным узроўні англійскую мову, тэрміны, якія выкарыстоўваюцца ў авіяцыі, наведваць факультатыў па матэматыцы, а таксама займацца плаваннем. Акрамя таго, ім выдадуць спецыяльную форму.

"Абмяркоўваецца пытанне стварэння аб’яднанняў па інтарэсах, у рамках дзейнасці якіх будзе рэалізавана праграма. Вынікам праграмы стане асваенне базавых авіяцыйных паняццяў", - расказалі ў Беларускай акадэміі авіяцыі.

Вучні авіяцыйных профіляў будуць з’яўляцца патэнцыяльнымі абітурыентамі Акадэміі авіяцыі.

Нагадаем, у 2021 годзе адбыўся першы ў гісторыі навучальнай установы набор пілотаў цывільных паветраных суднаў. Ужо ў чэрвені гэтага года курсанты пачнуць праходзіць практычную лётную падрыхтоўку.

У старэйшых класах беларускіх школ ужо некалькі гадоў функцыянуюць класы розных профіляў – аграрныя, педагагічныя, фізіка-матэматычныя, хіміка-біялагічныя, спартыўна-педагагічныя, інжынерныя і гэтак далей.

Мінск, 19 лютага 2023
Sputnik