"Устаноўлена, што мытныя плацяжы не выплачваюцца ў дачыненні да тавараў для асабістага карыстання, якія перасылаюцца ў міжнародных паштовых адпраўленнях на працягу каляндарнага месяца ў адрас адной фізасобы, якая знаходзіцца на тэрыторыі рэспублікі, і (або) альбо ўвозяцца на тэрыторыю краіны на працягу каляндарнага месяца ў адрас аднаго атрымальніка ў якасці тавараў, якія дастаўляюцца перавозчыкам, калі мытны кошт такіх тавараў у сукупнасці не перавышае суму, эквівалентную 22 еўра, і агульная вага ў сукупнасці не перавышае 10 кілаграмаў (раней 200 еўра і 31 кілаграм адпаведна)", — гаворыцца ў паведамленні.

Указ набудзе моц праз два месяцы пасля яго афіцыйнага апублікавання.

23 лістапада 2015 года старшыня Савета Рэспублікі Міхаіл Мясніковіч на пасяджэнні маніторынгавай групы па разглядзе праектаў указаў і законаў у верхняй палаце заявіў, што Беларусь будзе настойваць на абкладанні ПДК пасылак з-за мяжы, якія, паводле яго слоў, "абвалілі гандаль і стварылі праблемы для прамысловасці".

24 лістапада пытанне аб падаткаабкладанні пакупак у замежных інтэрнэт-крамах абмяркоўвалася ў Маскве на пасяджэнні Еўразійскай эканамічнай камісіі, аднак некаторыя прадстаўнікі краін — членаў ЕАЭС не падтрымалі рашэнне па абмежаванні бяспошліннага інтэрнэт-гандлю. Гэтае пытанне ў далейшым яшчэ будзе абмяркоўвацца, заявіў тады першы намеснік міністра эканамічнага развіцця Расіі Аляксей Ліхачоў.

14 снежня намеснік міністра гандлю Беларусі Ірына Наркевіч падкрэсліла, што рашэнне аб увядзенні збору на пакупкі ў замежных інтэрнэт-крамах павінна быць узважаным.

26 студзеня 2016 года старшыня Дзяржаўнага мытнага камітэта Юрый Сянько заявіў на прэс-канферэнцыі, што мытная служба не лічыць патрэбным ўводзіць абмежаванні па ўвозе пасылак з-за мяжы для асабістага карыстання. "Дзяржаўны мытны камітэт ставіць задачу не страціць кантроль за аб`ёмам міжнародных адпраўленняў, якія ідуць у адрас беларускіх спажыўцоў. Што тычыцца тавараў для асабістага карыстання, то тут ніякіх пытанняў няма. Гэта сапраўды вельмі зручны спосаб набыцця тавараў без неабходнасці выезду за мяжу. Мы рэагуем толькі на камерцыйныя партыі тавараў, якія спрабуюць увозіць пад выглядам асабістай маёмасці. У нас ёсць свая сістэма аналізу і кіравання рызыкамі, праграмнае забеспячэнне для разгляду перыядычнасці ўвозу адной і той асобай нейкіх тавараў, калі відаць, што ўвозяцца яны відавочна не для асабістага карыстання", — адзначыў Сянько.

Паводле яго слоў, колькасць пасылак з таварамі з-за мяжы ў 2015 годзе вырасла амаль удвая. "З кожным годам расце колькасць імпартаваных міжнародных паштовых адпраўленняў (МПА).

У 2013 годзе ў Беларусь паступіла 1,9 млн. МПА з таварнымі ўкладаннямі, у 2014 годзе — 6,3 млн., у 2015 годзе — 11,8 млн. Асноўную долю з іх складаюць адпраўленні, набытыя фізічнымі асобамі ў інтэрнэт-крамах Кітая, Ганконга, ЗША", — сказаў кіраўнік ДМК.

Дзмітрый Уласаў, БелаПАН
Мінск, 11 лютага 2016