У першыя тры месяцы 2015 года ў вытворчасці судовай калегіі па справах інтэлектуальнай уласнасці Вярхоўнага суда Беларусі знаходзілася 50 спраў. З іх 29 — спрэчкі ў сферы аўтарскага права і сумежных правоў; 21 — спрэчкі ў сферы права прамысловай уласнасці, з іх адна справа — скарга на рашэнне Апеляцыйнага савета пры патэнтным органе.

Усяго калегіяй разгледжана 28 спраў (56%), з якіх 22 склалі спрэчкі ў сферы аўтарскага права і сумежных правоў; шэсць — спрэчкі ў сферы права прамысловай уласнасці, з іх адна справа — скарга на рашэнне Апеляцыйнага савета пры патэнтным органе.

З вынясеннем рашэння разгледжана 12 спраў (42,9%), па 16 (57,1%) вынесены пастановы.

Па 10 справах патрабаванні задаволеныя ў поўным аб`ёме, па дзвюх справах у задавальненні патрабаванняў адмоўлена. Па адной справе заява пакінутая без разгляду ў сувязі з невыкананнем парадку папярэдняга дасудовага ўрэгулявання спрэчкі; па 15 справах (53,6%) вытворчасць спыненая, з іх па васьмі справах — у сувязі з адмовамі ад іскаў, па сямі справах — у сувязі з зацвярджэннем міравых пагадненняў.

Па стане на 1 красавіка ў вытворчасці знаходзяцца 22 справы.

Што да катэгорый разгледжаных спраў з вынясеннем судовых пастаноў, то разгледжана шэсць спраў у сферы прамысловасці ўласнасці). Іскавыя патрабаванні ў поўным аб`ёме задаволеныя па адной справе; адмоўлена ў задавальненні іскавых патрабаванняў па адной справе; па адной справе заява пакінутая без разгляду. Вытворчасць спыненая па трох справах у сувязі з адмовамі істцоў ад іскаў.

У сферы аўтарскага права разгледжаны 22 справы. Іскавыя патрабаванні задаволеныя ў поўным аб`ёме па 9 справах; адмоўлена ў задавальненні іскавых патрабаванняў па адной справе. Па 12 справах вытворчасць спынена, з якіх па пяці справах — у сувязі з адмовай істцоў ад іскаў, па сямі справах — у сувязі з зацвярджэннем міравых пагадненняў.

Па пяці справах істцамі, адказчыкамі і трэцімі асобамі з`яўляліся замежныя кампаніі і арганізацыі.

У студзені—сакавіку 2015 года істцамі і заяўнікамі ў рэспубліканскі бюджэт па пададзеных ісках, скаргах і заявах аплачана дзяржаўная пошліна ў агульным памеры 65.338.301 рублёў, 560 еўра, 587,08 долараў.

Па 12 справах (42,9%) праводзіліся папярэднія пасяджэнні, з іх па 10 на папярэдніх пасяджэннях вынесены судовыя пастановы.

Усе 28 разгледжаных па сутнасці спраў закончаны вытворчасцю ў першым судовым пасяджэнні, што сведчыць аб правядзенні суддзямі калегіі належнай падрыхтоўкі спраў да судовага разбору, зазначаецца ў інфармацыі прэс-службы ВС.

Усе справы былі разгледжаныя ва ўстаноўленыя заканадаўствам працэсуальныя тэрміны.

З удзелам адвакатаў і патэнтных павераных разгледжана 10 спраў, што складае 35,7% ад усіх разгледжаных.

У парадку судовага нагляду было праверана адно рашэнне калегіі. Судовая пастанова прызнаная законнай і абгрунтаванай і ў прынясенні па ёй пратэсту ў парадку нагляду адмоўлена.

У студзені—сакавіку 2015 года адмен судовых пастаноў у парадку нагляду не было.

У ВС зазначаюць, што аналіз прыведзеных вышэй звестак сведчыць, што суддзі калегіі ў справаздачны перыяд забяспечвалі на належным узроўні абарону правоў і законных інтарэсаў грамадзян і юрыдычных асоб у сферы прамысловай уласнасці і аўтарскага права. Суддзямі калегіі не было дапушчана неабгрунтаваных адкладанняў судовых разбораў з-за неналежнай дасудовай падрыхтоўкі, усе пастаноўленыя калегіяй рашэнні перададзеныя на выкананне, частка з іх выканана, а таксама ажыццяўляецца кантроль за выкананнем тых судовых пастаноў, якія на канец справаздачнага перыяду выкананыя не былі.

Вячаслаў Будкевіч, БелаПАН
Мінск, 12 красавіка 2015