Падраздзяленні і воінскія часці Узброеных Сіл Беларусі і Усходняй ваеннай акругі Узброеных Сіл Расіі, задзейнічаныя ў праверцы сіл рэагавання Саюзнай дзяржавы, пачалі этап баявога зладжвання на палігонах Даманаўскі, Гожскі, Абуз-Лясноўскі, Брэсцкі і Асіповіцкі. 

"З мотастралковымі падраздзяленнямі, экіпажамі танкаў, баявых машын пяхоты, артылерыйскімі разлікамі, разлікамі процітанкавых кіруемых ракетных комплексаў праводзяцца кантрольныя заняткі па тактычнай і агнявой падрыхтоўцы, ваджэнні баявых машын і іншых прадметах абучэння. Падраздзяленні Узброеных Сіл Расіі сумесна з падраздзяленнямі Узброеных Сіл Беларусі ў адзіных баявых парадках адпрацоўваюць розныя прыёмы і спосабы баявых дзеянняў. У ходзе этапу баявога зладжвання на палігонах адпрацоўваюцца пытанні вядзення абароны і барацьбы з незаконнымі ўзброенымі фармаваннямі", - гаворыцца ў паведамленні.

Як адзначылі ў Мінабароны, мэтай баявога зладжвання з`яўляецца дасягненне высокага ўзроўню гатоўнасці падраздзяленняў да сумесных дзеянняў.

Праверка сіл рэагавання Саюзнай дзяржавы праходзіць у два этапы.

На першым этапе, да 9 лютага, выконваецца перадыслакацыя і стварэнне ў кароткія тэрміны груповак войскаў (сіл) на тэрыторыі Беларусі, арганізацыя аховы і абароны важных дзяржаўных і ваенных аб`ектаў, ахова дзяржаўнай граніцы ў паветранай прасторы, праверка гатоўнасці і здольнасці дзяжурных па ППА сіл і сродкаў выканаць задачы па прыкрыцці важных аб`ектаў на тэрыторыі Беларусі.

У ходзе другога этапу праверкі, з 10 па 20 лютага, будзе праведзена сумеснае вучэнне "Саюзная рашучасць-2022", у рамках якога будуць адпрацаваны пытанні спынення і адбіцця знешняй агрэсіі, а таксама процідзеяння тэрарызму і абароны інтарэсаў Саюзнай дзяржавы.

У ходзе вучэння будуць выконвацца мерапрыемствы па ўзмацненні аховы дзяржаўнай граніцы для спынення пранікнення ўзброеных груп баевікоў, перакрыцці каналаў дастаўкі зброі і боепрыпасаў, а таксама пошуку, блакіраванні, знішчэнні незаконных узброеных фарміраванняў і дыверсійна-разведвальных груп праціўніка.

Практычныя дзеянні войскаў пройдуць на палігонах Даманаўскі, Гожскі, Абуз-Лясноўскі, Брэсцкі і Асіповіцкі, а таксама асобных участках мясцовасці, размешчаных на тэрыторыі Беларусі. Плануецца задзейнічаць аэрадромы Баранавічы, Лунінец, Ліда і Мачулішчы.

У міністэрстве падкрэслілі, што колькасць прыцягнутых ваеннаслужачых і тэхнікі на вучэнні, што пападаюць пад дзеянне Венскага дакумента 2011 года, "не перавышае параметры, якія падлягаюць паведамленню".

2 лютага 2022, Мінск
БЕЛТА