Кіраўнікі дзяржаў абмеркавалі развіццё супрацоўніцтва ў розных сферах, міжнародную праблематыку.

Падчас перагавораў Аляксандр Лукашэнка адзначыў, што адно з галоўных пытанняў, якім неабходна займацца, гэта эканоміка, бо не толькі ў дачыненні да Беларусі, але і Расіі ўводзяць або падаўжаюць санкцыі. Тым не менш Прэзідэнт упэўнены, што краіны вытрымаюць гэты ўдар.

«Як я калісьці і казаў, няма чаго нам з гэтай нагоды парыцца. Мы ўсё ж такі эканоміцы ўдзяляем больш увагі, чым у СССР, мы людзей глядзім больш. Мы вытрымаем. Нават не вытрымаем — мы будзем развівацца. Гэта не пытанне. Сёння не атрымаецца манапалізаваць міжнародны парадак дня і націснуць на нас. Не атрымаецца! Свет змяніўся», — падкрэсліў беларускі лідар.

«Усе сябры добрыя, але мы сваімі мазгамі павінны жыць, як у нас гэта і атрымлівалася», — дадаў Прэзідэнт.

Аляксандр Лукашэнка назваў пазітыўным той факт, што расце тавараабарот Беларусі і Расіі. Ён пагадзіўся з тым, што любыя санкцыі — гэта магчымасці, і гэта бачна па развіцці расійскай эканомікі: «Натуральна, што наша эканоміка вельмі сур’ёзна прывязаная да расійскай. Мы захавалі многія кааперацыйныя адносіны з Расіяй, не пайшлі тым шляхам, як іншыя рэспублікі, асабліва наша паўднёвая суседка. Мы не рвалі сувязі. Захавалі наогул усю прамысловасць, а дзе-нідзе і дадалі, таксама дзякуючы інвестыцыям Расійскай Федэрацыі», — сказаў Прэзідэнт.

Аляксандр Лукашэнка канстатаваў, што ў фінансавым дачыненні да Беларусі заўсёды было няпроста. «Вы разумееце, чаму. І тут падтрымка была вельмі сур’ёзная з боку Расіі. Але мы свята стараемся выконваць свае абавязацельствы па крэдытах, якія выдадзены, і будзем іх выконваць, чаго б нам ні каштавала», — заявіў кіраўнік дзяржавы.

Што тычыцца заходніх санкцый, Прэзідэнт Беларусі адзначыў, што пасля чарговай іх хвалі вядзецца дыверсіфікацыя ў эканоміцы, аднак па цэлым шэрагу кірункаў аб’ёмы гандлю з Еўрасаюзам і ў ранейшыя гады былі зусім невялікімі. Напрыклад, для тых, якія трапілі пад санкцыі МАЗа і БелАЗа гэта $3,3 мільёны і $4 млн. «Мы працуем на сваіх рынках, як гэта было. Дзякуючы таму, што мы не парвалі сувязі, нам удаецца у гэта вельмі складаны час неяк караскацца ў эканоміцы», — сказаў Аляксандр Лукашэнка.

Паводле яго слоў, справа нават не ў санкцыях, а ў тым,што сусветная эканоміка ў цэлым сур’ёзна прасела і ўсе краіны схільныя гэтаму ўплыву. «Мы вытрымаем», — упэўнены беларускі лідар.Ён таксама адзначыў неабходнасць надаваць прыярытэтную ўвагу пытанням бяспекі Беларусі і Расіі. «Як бы яны нас ні закалыхвалі (апаненты.), Мы бачым, што паступілі ў свой час правільна, надаючы ўвагу абароне нашых дзяржаў і бяспекі», — сказаў Аляксандр Лукашэнка.

Кіраўнік дзяржавы падкрэсліў, што праціўнікі ўлады ў Беларусі перайшлі да індывідуальнага тэрору. Ён адзначыў, што гэта стала наступным этапам так званай каляровай рэвалюцыі або мецяжу ў Беларусі. «Я інфармаваў вас па некаторых пытаннях. І кожныя суткі ёсць развіццё. Індывідуальны тэрор супраць тых людзей, якія казалі адкрыта, тых, якія выступалі за дзяржаву. Цяпер ужо на дэпутатаў перайшлі. І мярзотнікі падбіраюць час, атакуючы жыллё аднаго з лідараў сярод дэпутатаў, партыі, калі дзеці там. Спрабуюць націснуць, запалохаць», — расказаў беларускі лідар. «Думаю, гэта справа часу. Мы ўсіх іх вылічым. І знойдзем, прыцягнем да адказнасці, прытым у сур’ёзнай форме», — падкрэсліў Аляксандр Лукашэнка.

Акрамя таго, расказаў Прэзідэнт, у Беларусі вельмі актыўна цяпер пачалі працу ў дачыненні да розных НКА, НУА, так званых заходніх СМІ. «Якія тут дэмакратыю нам дарылі, а фактычна насаджалі. І не дэмакратыю, а вось гэты вось тэрор, — сказаў беларускі лідар. — Вы павінны разумець, што мы проста не можам інакш. Чым яны займаліся, зразумела. Яны фінансаваліся звонку. А мы усе думалі: ну добра, гэта ж дэмакратыя, давайце будзем размаўляць, супрацоўнічаць. Вось і атрымалі адпаведныя вынікі».

«Усё роўна, Уладзімір Уладзіміравіч, гэта для нас не катастрофа. Тэрор гэты і іншае. Мы справімся», — упэўнены Аляксандр Лукашэнка.

У сваю чаргу Прэзідэнт Расіі падкрэсліў, што Беларусь застаецца для Расіі вялікім і надзейным партнёрам у эканоміцы. Ён звярнуў увагу, што, нягледзячы на знешнія выклікі, санкцыі і пандэмію, эканоміка Беларусі дэманструе нядрэнныя паказчыкі. У прыватнасці, рэспубліка абслугоўвае ўсе крэдыты, больш за тое, яе знешні доўг скарачаецца. «У гэтым сэнсе Беларусь надзейны, стабільны партнёр», — заявіў расійскі лідар.

Паводле прэс-службы Прэзідэнта

Звязда, 14 ліпеня 2021