«Навукова-тэхнічны прагрэс і бурнае развіццё сталёвых магістраляў у XIX стагоддзі заклалі аснову для стварэння чыгуначных войскаў. Іх гісторыя налічвае без малога паўтара стагоддзя — з дня ўтварэння ў 1876 годзе першага чыгуначнага батальёна ў Баранавічах. За плячыма воінаў-чыгуначнікаў удзел у руска-турэцкай, Першай сусветнай і грамадзянскай войнах, — гаворыцца ў віншаванні. — Асабліва неацэнны іх уклад у перамогу над фашысцкай Германіяй. Асабісты склад чыгуначных частак пакрыў сябе вялікай славай, згуляўшы адказную ролю ў транспартным забеспячэнні найбуйнейшых аперацый Вялікай Айчыннай вайны, усімі сіламі набліжаючы Вялікую Перамогу».

Кіраўнік дзяржавы адзначыў, што сёння транспартныя войскі, з’яўляючыся годнымі пераемнікамі чыгуначных войскаў, свята ўшаноўваюць традыцыі гераічных папярэднікаў і сваёй штодзённай працай уносяць годны ўклад ва ўмацаванне ваеннай бяспекі дзяржавы. «Дзякую за службу! Ад усёй душы жадаю моцнага здароўя, шчасця і дабрабыту вам і вашым сем’ям, а таксама новых поспехаў на карысць роднай Беларусі!» — пажадаў Прэзідэнт.

Звязда, 6 жніўня 2022