Белорусский портал в Казахстане

Запаволенне інфляцыі да 7-8 адсоткаў



Пра гэта гаворыцца ў зацверджаных Указам Прэзідэнта асноўных напрамках грашова-крэдытнай палітыкі на 2023 год.

Кіраўнік дзяржавы Аляксандр Лукашэнка 28 лістапада падпісаў указ нумар 412, якім зацверджаны асноўныя напрамкі грашова-крэдытнай палітыкі на 2023 год, паведамілі ў прэс-службе Прэзідэнта.

Грашова-крэдытная палітыка будзе арыентавана на запаволенне інфляцыі да ўзроўню 7-8 адсоткаў і падтрыманне фінансавай стабільнасці.

Працягнецца кантроль за ростам грашовай прапановы. Сярэдняя шырокая грашовая маса павялічыцца на 12-16 адсоткаў у гадавым выражэнні, рублёвая грашовая база — на 10-12 адсоткаў.

Прадугледжана фармаванне належных рэсурсных крыніц для задавальнення плацежаздольнага попыту на крэдыты для фінансавання інвестыцыйных праектаў. Ацэньваецца, што патрабаванні банкаў да эканомікі вырастуць на 17-21 адсотак.

Працэнтныя стаўкі ў эканоміцы плануецца захаваць на станоўчым узроўні ў рэальным выражэнні (як умова прывабнасці дэпазітнага рынку і крыніца крэдытавання эканомікі). Стаўка рэфінансавання прадугледжана ў памеры 10-11 адсоткаў гадавых.

Курсавая палітыка будзе праводзіцца ў рэжыме плаваючага курса (на аснове попыту і прапановы на валютным рынку), што дапускае валютныя інтэрвенцыі для згладжвання рэзкіх ваганняў курса беларускага рубля.

Звязда, 28 лістапада 2022

Ссылка на текущий документ: http://belarus.kz/aktueller/2-/1/67223
Текущая дата: 29.03.2024