У Беларусі лекі можна будзе купіць у аптэцы анлайн. Гэта прадугледжана пастановай Міністэрства аховы здароўя № 69 ад 3 мая 2023 года «Аб рознічнай рэалізацыі лекавых прэпаратаў дыстанцыйным спосабам».

Як адзначылі ў Міністэрстве, такое новаўвядзенне паспрыяе паляпшэнню даступнасці лекавага забеспячэння насельніцтва і пашырыць магчымасці для вядзення бізнесу ў гэтай сферы.

Удакладняецца, што весці дадзеную дзейнасць змогуць юрыдычныя асобы, у якіх ёсць ліцэнзія на ажыццяўленне фармдзейнасці ў частцы работ і (або) паслуг па рознічнай рэалізацыі лекаў дыстанцыйным спосабам.

Такім чынам могуць рэалізоўвацца безрэцэптурныя лекавыя прэпараты. Выключэннем будуць спіртазмяшчальныя лекі з аб’ёмнай доляй этылавага спірту больш за 25%.

У Міністэрстве аховы здароўя адзначылі, што продаж лекавых прэпаратаў будзе адбывацца праз інтэрнэт-аптэку, зарэгістраваную ў Інтэрнэце, з дапамогай якой таксама магчыма атрымаць фармацэўтычнае кансультаванне. Юрыдычная асоба зможа даставіць заказ як уласнымі сіламі праз службу дастаўкі, так і з прыцягненнем арганізацыі, якая прадстаўляе кур’ерскую паслугі.

Для юрыдычных асоб у Міністэрстве аховы здароўя ўдакладнілі, што інтэрнэт-аптэка, праз якую будуць рэалізоўвацца лекпрэпараты, павінна быць зарэгістраваная на ўласным сайце гэтага юрыдычныя асобы. Пры гэтым не прадугледжваецца ўдзел сайтаў-агрэгатараў у падпарадкаванні дадзенай дзейнасці.

Каб выключыць прысутнасць нядобрасумленных юрыдычных асоб, фішынгавых (падробленых) сайтаў і не дапусціць распаўсюджвання фальсіфікаваных або кантрафактных лекаў, «Дзяржфармнагляд» фарміруе пералік юрыдычных асоб, якія займаюцца рознічнай рэалізацыяй лекавых прэпаратаў дыстанцыйным спосабам. У гэты пералік уключаецца інфармацыя аб назве юрыдычнай асобы, інтэрнэт-адрасе аптэкі, а таксама назве арганізацыі, якая прадстаўляе кур’ерскую паслугі. Пералік размяшчаецца на афіцыйным сайце «Дзяржфармнагляду». Грамадзяне змогуць азнаёміцца з гэтай інфармацыяй і праверыць сапраўднасць юрыдычнай асобы, у якой яны заказваюць лекавы прэпарат.

Звязда, 21 траўня 2023