Сёння апарат ЦВК на чале з Ігарам Карпенкам працуе на тэрыторыі Верхняга замка ў Полацку. Разам з імі працуюць кадэты і іх бацькі. Тут выкананы работы па заліванні фундамента для помніка Герою Беларусі Мікіту Куканенку, высаджваюцца кусты.

"Прыемна бачыць, як мяняецца Верхні горад. Фактычна мы ўдыхнём новае жыццё ў будынкі, якія пуставалі, а цяпер будуць выконваць вельмі важную адукацыйную функцыю - тут будзе размяшчацца Полацкае кадэцкае вучылішча. Праз кадэцкі корпус прайшло шмат выдатных военачальнікаў. І сімвалічна, што ў час суботніка мы закладваем фундамент для помніка Герою Беларусі Мікіту Куканенку", - сказаў Ігар Карпенка.

У Полацку на тэрыторыі Верхняга замка з 2021 года праходзіць маштабная рэканструкцыя будынкаў для Полацкага кадэцкага вучылішча. Плануецца, што 1 верасня адкрыццё навучальнага працэсу для кадэтаў адбудзецца на гістарычным месцы - тэрыторыі Полацкага кадэцкага корпуса. "Спадзяюся, што з 1 верасня тут закіпіць жыццё, пачнецца адукацыйны працэс, і гэта месца стане пунктам культурна-экскурсійнага прыцягнення турыстаў", - адзначыў кіраўнік ЦВК.

"У Беларусі ўдзяляецца вялікая ўвага падтрымцы гісторыка-культурнай спадчыны, невыпадкова 2023-і аб`яўлены Годам міру і стварэння. Толькі мірныя людзі, якія накіраваны ў будучыню, думаюць пра сваіх дзяцей, унукаў і праўнукаў, будучыя пакаленні, могуць ствараць такія выдатныя аб`екты, якія будуць працаваць на перспектыву", - падкрэсліў Ігар Карпенка. Акрамя таго, кіраўнік ЦВК падарыў Полацкаму кадэцкаму вучылішчу макет масава-габарытны 7,62 мм карабіна СКС і перадаў кнігі ў новую бібліятэку.

Рэспубліканскі суботнік праходзіць сёння ў Беларусі. У гэты дзень беларусы добраўпарадкоўваюць і прыводзяць у належны стан аб`екты і тэрыторыі населеных пунктаў, гісторыка-культурныя каштоўнасці, мемарыяльныя комплексы, месцы баявой і воінскай славы, пахаванні воінаў і партызан часоў Вялікай Айчыннай вайны. Палову грашовых сродкаў, заробленых у дзень правядзення рэспубліканскага суботніка, плануецца накіраваць Гомельскаму аблвыканкаму на рэканструкцыю мемарыяльнага комплексу вязням Азарыцкага лагера смерці (Калінкавіцкі раён). Яшчэ 50 працэнтаў пералічаць Брэсцкаму аблвыканкаму на стварэнне Рэспубліканскага цэнтра патрыятычнага выхавання моладзі на базе Кобрынскага ўмацавання Брэсцкай крэпасці.

22 красавіка 2023, Мінск
БЕЛТА