"Наша з вамі місія - служыць чалавеку", - сказала Ірына Касцевіч, звяртаючыся да сацыяльных работнікаў. Яна адзначыла, што ў галіне працуюць асаблівыя людзі, якім уласцівы дабрыня, міласэрнасць, спагада, увага і чуласць.

"Гэта не толькі прафесіяналы, гэта людзі з вялікай літары. Яны дапамагаюць вырашыць складаныя пытанні ў жыцці і робяць гэта на прафесійным узроўні. Ваша міласэрнасць, жаданне дапамагаць людзям, спагада - гэта сапраўды дарагога варта", - упэўнена міністр.

Работнікі сферы сацабароны аказваюць садзейнічанне ў працаўладкаванні, ствараюць бяспечныя і здаровыя ўмовы працы.

"Сёння не абавязкова ісці ў службу занятасці, можна праз дзяржаўны банк вакансій знайсці тую вакансію з той заработнай платай, якая адпавядае тваім патрабаванням. А ў Працоўным кодэксе замацаваны новыя сучасныя механізмы, у прыватнасці дыстанцыйная работа", - адзначыла Ірына Касцевіч, размаўляючы з журналістамі.

У Беларусі рэалізуецца Нацыянальная стратэгія "Актыўнае даўгалецце - 2030". У краіне налічваецца больш за 3 тыс. валанцёраў "сярэбранага" ўзросту. Разам з тым некаторыя людзі старога ўзросту і самі маюць патрэбу ў абароне і клопаце, і сфера сацыяльнага абслугоўвання прадастаўляе неабходныя паслугі.

Міністр падкрэсліла, што для дапамогі пажылым людзям створана цудоўная інфраструктура сацыяльнага абслугоўвання, якая дапамагае чалавеку ў старым узросце, які трапіў у цяжкую жыццёвую сітуацыю, вырашыць любыя пытанні.

Сур`ёзная падтрымка, у тым ліку матэрыяльная, аказваецца і інвалідам. Ірына Касцевіч адзначыла, што 6 студзеня 2023 года ўступіць у сілу закон "Аб правах інвалідаў і іх сацыяльнай інтэграцыі". Ён улічвае нормы абноўленай Канстытуцыі, Канвенцыі аб правах інвалідаў і ўключае розныя напрамкі, у тым ліку пытанні даступнага асяроддзя, ільгот, працаўладкавання, інфарматызацыі.

У сістэме сацыяльнай абароны Беларусі працуюць каля 14 тыс. сацыяльных работнікаў. У гэтай прафесіі пераважна жаночы твар. Сярэдні ўзрост сацыяльных работнікаў - 49 гадоў. Сумарна сацработнікі краіны дапамагаюць амаль 100 тыс. пажылых і інвалідаў. Яны наведваюць іх да пяці разоў на тыдзень. У сярэднім на аднаго сацыяльнага работніка прыпадае восем падапечных. На 1 студзеня 2023 года сярэдняя зарплата сацработніка склала Br840.

5 студзеня 2023, Мінск
БЕЛТА