Прадстаўнікі Камуністычнай партыі Беларусі і шэрага грамадскіх аб’яднанняў правялі ў Мінску шэсце з нагоды стагоддзя стварэння СССР.

Каля помніка Леніну на плошчы Незалежнасці ў цэнтры горада адбылася цырымонія ўскладання вянкоў, пасля чаго ўдзельнікі прайшлі шэсцем да Кастрычніцкай плошчы.

Правядзенне мерапрыемства было ўзгоднена з гарадскімі ўладамі.

Калона са сцягамі і транспарантамі рухалася па тратуары, не ствараючы праблем аўтамабілістам.

Многія неслі ў руках сцягі СССР, БССР, копіі Сцяга Перамогі. Былі і тыя, хто прыйшоў на мітынг з фатаграфіямі сваіх бацькоў і дзядоў, якія ваявалі ў Вялікай Айчыннай вайне.

Мітынг, прымеркаваны да стагоддзя СССР, працягнуўся на Кастрычніцкай плошчы каля Палаца культуры прафсаюзаў.

Як вядома, Саюз, у які аб’ядналіся РСФСР, Украінская ССР, Беларуская ССР і Закаўказская СФСР, быў створаны 30 снежня 1922 года.

Дзяржава праіснавала да 8 снежня 1991 года, калі прадстаўнікамі Расіі, Украіны і Беларусі былі падпісаны Белавежскія пагадненні, якія паставілі кропку ў гісторыі СССР. Свае подпісы пад дакументам паставілі Вячаслаў Кебіч і Станіслаў Шушкевіч ад Беларусі, Барыс Ельцын і Генадзь Бурбуліс ад Расіі, а таксама Леанід Краўчук і Вітольд Фокін ад Украіны.

26 снежня 1991 года Вярхоўным Саветам СССР была прынята дэкларацыя аб спыненні існавання Саюза.

Sputnik, 30 снежня 2022