У гэты дзень у 2001 годзе была здзейснена тэрарыстычная атака на Сусветны гандлёвы цэнтр у ЗША. Якія яшчэ падзеі адбыліся 11 верасня і чым адзначаны гэты дзень у народным календары, чытайце далей:

У 1938 годзе быў адкрыты для наведвальнікаў Дом-музей Адама Міцкевіча ў Наваградку.

У 1992 годзе адбылося адкрыццё Навагрудскага гісторыка-краязнаўчага музея.

1855 год: Еўдакім Раманаў, беларускі фалькларыст, этнограф, археолаг.

1972 год: Алесь Пашкевіч, беларускі паэт, празаік, літаратуразнаўца.

Таксама сёння нарадзіліся савецкі дзяржаўны дзеяч Фелікс Дзяржынскі, савецкі касманаўт Герман Цітоў і савецкі і расійскі спявак, Народны артыст СССР Іосіф Кабзон.

У гэты дзень адбылося адсячэнне галавы Іаана Прадцечы. 11 верасня ў народзе нацываюць Іван Галавасек або Іван Калінавік. На Іаана прынята было пасціцца і забаранялася есці круглыя плады, таму што Ірадыяда, нібыта з яблыкам, гуляла з адсечанай галавой Хрысціцеля, якую паднеслі на талерцы. Нельга таксама было нешта рэзаць – хлеб ламалі рукамі.

Калінавік гэты дзень называецца таму, што збіралі саспелыя ягады каліны і рабілі з іх кісель, дадавалі ў пірагі і кашы.

Пачынаецца бабіна лета – крыху цяплее, радзей ідуць восеньскія дажджы. Ёсць меркаванне, што "бабіным" гэты перыяд называецца таму, што ў гаспадарцы пачыналіся жаночыя справы: трэба было сабраць садавіну і гародніну, высушыць і спрасці лён і каноплю.

У гэты час, які доўжыўся звычайна два-тры тыдні, пакуль прыгожа і сонечна, імкнуліся справіць вяселлі.