«Сёння ў рэспубліцы пражывае каля 12 тыс. ветэранаў і асоб, якія пацярпелі ад наступстваў вайны, з іх крыху больш за 2 тыс. ветэранаў. Сярод грамадзян, якія пацярпелі ад вайны, 90 працэнтаў складаюць вязні фашызму», — расказала Марына Арцёменка.

Ветэранам Вялікай Айчыннай вайны ў нашай краіне прадастаўляюцца дзяржаўныя сацыяльныя льготы ў сферы аховы здароўя, санаторна-курортнага лячэння, у праездзе, жыллёвай сферы і іншыя.

«Выдаткі на прадастаўленне дзяржаўных сацыяльных ільгот складаюць на аднаго чалавека ў год фактычна больш за Br2 тыс. і ўключаюць у сябе бясплатнае забеспячэнне лекавымі сродкамі, выраб і рамонт зубных пратэзаў, забеспячэнне тэхнічнымі сродкамі сацыяльнай рэабілітацыі, санаторна-курортнае лячэнне і аздараўленне, у тым ліку пазачарговае, праезд на ўсіх відах гарадскога і прыгараднага пасажырскага транспарту, скідку ў памеры 50 працэнтаў ад платы за жыллёва-камунальныя паслугі, правядзенне рамонту жылых памяшканняў за кошт сродкаў мясцовых бюджэтаў. Таксама ў выпадку, калі ветэран, удзельнік вайны або асоба, якая пацярпела ад вайны, не скарыстаўся правам на санаторна-курортнае лячэнне, то выплата складзе 10 базавых велічынь», — звярнула ўвагу намеснік міністра працы і сацыяльнай абароны.

Да Дня Перамогі ўстаноўлена матэрыяльная дапамога ветэранам і асобам, якія пацярпелі ад наступстваў Вялікай Айчыннай вайны. У бягучым годзе яе памер склаў: удзельнікам і інвалідам вайны — Br1,8 тыс., іншым катэгорыям ветэранаў вайны — Br1 тыс., членам сем’яў ваеннаслужачых, партызан і падпольшчыкаў, загінулых у гады вайны, былым вязням фашызму, інвалідам з дзяцінства ў выніку ранення, кантузіі, калецтва, звязаных з баявымі дзеяннямі ў перыяд вайны, — Br750. Выплата ажыццяўляецца з 25 красавіка па 6 мая.

«Сёння, 5 мая, можна сказаць, што выплата матэрыяльнай дапамогі ў краіне фактычна завершана, засталіся толькі адзінкавыя выпадкі, калі людзі або шпіталізаваны, або знаходзяцца ў іншых раёнах. На сёння матдапамогу атрымалі 11 836 чалавек на агульную суму крыху большую за Br10 млн», — адзначыла намеснік міністра.

Акрамя аднаразовай матэрыяльнай дапамогі, устаноўлены даплаты да пенсіі для такіх катэгорый, як ветэраны, што пацярпелі ад наступстваў вайны.

«Гэта дадатковая штомесячная выплата, штомесячная ўзроставая даплата для асоб, якія дасягнулі 75 і 80 гадоў. Акрамя таго, да пенсіі штомесяц выплачваецца надбаўка на догляд, — рэзюмавала Марына Арцёменка. — Такім чынам, сумарны памер штомесячнай выплаты да пенсіі для ўдзельнікаў вайны з 1 мая бягучага года складае ад Br311 да Br467».

Звязда, 5 траўня 2022