Статус прысуджаецца гораду па выніках конкурсу тэрмінам на адзін год. На працягу гэтага часу ён атрымлівае магчымасць дэманстраваць сваю прыхільнасць да сучаснай моладзевай культуры і дзяліцца найлепшымі практыкамі па развіцці сацыяльнай, эканамічнай і палітычнай актыўнасці моладзі. 

— У 2016 годзе першай моладзевай сталіцай Беларусі сталі Баранавічы. Затым былі Полацк, Магілёў, Орша, Пінск, Гродна... У перыяд валодання статусам моладзевай сталіцы горад ажывае за кошт прытоку маладых людзей з усёй краіны, — падкрэслівае намеснік міністра адукацыі Аляксандр Кадлубай. — Усе ініцыятывы перамяшчаюцца ў моладзевую сталіцу. Гэта сур`ёзная адказнасць — арганізоўваць мерапрыемствы, прымаць гасцей. Але разам з тым і сур`ёзны імпульс для развіцця горада, які ўбірае ўсе найлепшыя ідэі....

На працягу трох дзён (з 10 да 12 сакавіка) у Віцебску будуць праходзіць маштабныя мерапрыемствы, адбудзецца вялікая колькасць дыялогавых пляцовак па самых розных тэмах: «Будуем будучыню разам», «Моладзь Беларусі: памятаем мінулае, рухаемся ў будучыню «Валанцёрскі рух», «Медыясфра» і іншых. Маладыя людзі абмяркуюць хвалюючыя пытанні і выступяць з асабістымі ініцыятывамі. Удзел у святочных мерапрыемствах возьме больш як 400 удзельнікаў з усіх рэгіёнаў Беларусі, сярод іх прадстаўнікі студэнцкай моладзі, маладыя навукоўцы, каардынатары валанцёрскіх праектаў.

Адбудзецца ўрачысты мітынг каля мемарыяльнага комплексу ў гонар савецкіх воінаў-вызваліцеляў, партызанаў і падпольшчыкаў. Кульмінацыйнай падзеяй стане цырымонія адкрыцця свята 10 сакавіка ў канцэртнай зале «Віцебск».

Надзея Нікалаева
Звязда, 9 сакавіка 2022