«Гэта зусім сімвалічны знак падзякі і павагі ўсім супрацоўнікам сферы аховы здароўя за іх тытанічную працу, мужнасць. сілы і цярпенне, — адзначае дырэктар тэатра Святлана Карукіна. — Але мы маем за доўг і гонар зрабіць гэта, бо распаўсюджванне віруса стала і нашай асабістай гісторыяй, якая наўпрост датычыцца тэатра».

У пастаноўцы, прымеркаванай да Дня медыка, занятыя акцёры Максім Брагінец, Вераніка Буслаева, Анастасія Баброва, Уладзіслаў Наздрын.

Аб тым, як каранавірус закрануў акцёраў і супрацоўнікаў РТБД, распавядзе і адмысловы міні-фільм, стваральнікі якога выкажуць сваю персанальную падзяку беларускім медыкам. Пачатак прамой трансляцыі а 19-й гадзіне, а запіс будзе дасяжны і пазней, да 24 гадзін да 21 чэрвеня.

«Запрашаем усіх жадаючых прыяднацца да нас, хоць і віртуальна. Далучайцеся, бо разам мы мацнейшыя!» — гаворыцца ў звароце тэатра да гледачоў.

Нагадаем, прэм’ера музычнай камедыі «Адамавы жарты» па творах Ф.Аляхновіча і Л.Родзевіча адбылася ў ліпені 2010 года. Лёгкі, дынамічны спектакль, у якім спалучаюцца казка і рэальнасць, сучаснасць і старажытнасць, сапраўднасць і карыкатура, расказвае гісторыю сямейнай пары Саўкі і Марысі, чымсьці падобных да біблейскіх Адама і Евы, у мірнае жыццё якіх аднойчы зазірае Чорт...

Вікторыя Захарава
Звязда, 16 чэрвеня 2020