Патрыятычны анлайн-квіз стаў часткай праекта «I БРСМ I анлайн». Ён уяўляў сабой серыю тэматычных заданняў да 75-годдзя Перамогі. На анлайн-платформе былі апублікаваны пытанні аб ваенных падзеях, подзвігах, пераможных бітвах і аперацыях, гістарычных фактах, гарадах-героях, літаратурных творах і фільмах разам з варыянтамі адказаў.

На працягу 35 хвілін 460 чалавек адначасова прымалі ўдзел у інтэлектуальнай патрыятычнай гульні. На адзін адказ адводзілася 21 секунда. У прамым эфіры акрамя пытанняў ішоў дыялог вядучага і ўдзельнікаў квіза. Вядучы Міхаіл Сяркоў быў апрануты ў салдацкую форму ваенных гадоў, у такім жа стылі была аформлена і студыя. Асаблівасцю гульні стала тое, што вядучы бачыў адказы пераможцаў у працэнтных суадносінах і стараўся задаваць навадныя пытанні. Такім чынам падтрымлівалася сувязь з гульцамі і па выніку вызначыліся пяць пераможцаў.

Першага месца ўдастоены Георгій Булатаў з Віцебска. Анастасія Карпыза, якая атрымала перамогу ў мінулым квізе, на гэты раз узяла другую пазіцыю. Далей у пераможнай пяцёрцы размясціліся Аляксандра Полагава з вёскі Малыя Жухавічы Гродзенскай вобласці, Юрый Рудзік са Жлобіна і Анастасія Іванчанка з Віцебска. Саюз моладзі падрыхтаваў для пераможцаў стылізаваныя падарункі: заплечнік, тэрмас, пераносную калонку і падушкі-трансформеры.

Анлайн-праект «I БРСМ I анлайн» стартаваў 5 красавіка на пляцоўках Беларускага рэспубліканскага саюза моладзі ў сацыяльных сетках. За гэты час адбыліся сустрэчы з папулярнымі вядучымі і артыстамі беларускай эстрады, знакамітымі спартсменамі, паспяхова апрабаваны прамыя эфіры, для актывістаў арганізацыі праводзяцца модныя фотасеты StayAtHome.

Сяргей Расолька
Звязда, 13 траўня 2020