Як паведаміла афіцыйны прадстаўнік упраўлення Следчага камітэта па Брэсцкай вобласці Марына Дранькова, Брэсцкім міжраённым аддзелам Следчага камітэта расследуюцца дзве справы на падставе ч. 1 арт. 139 КК (забойства) па фактах супрацьпраўнага пазбаўлення жыцця жанчын 1961 і 1970 гадоў нараджэння ў абласным цэнтры.

У першым выпадку злачынства ў дачыненні да 56-гадовай мясцовай жыхаркі было ўчынена ў яе кватэры днём 19 ліпеня. Падазраваны — 34-гадовы сын брастаўчанкі. Следствам папярэдне ўстаноўлена, што паміж сваякамі адбыўся канфлікт пасля сумеснага распівання спіртных напояў, які прывёў да трагічных наступстваў.

21 ліпеня да мужчыны прыменена мера стрымання ў выглядзе заключэння пад варту. У рамках высвятлення ўсіх акалічнасцяў з удзелам фігуранта праведзена праверка паказанняў на месцы з прымяненнем відэазапісу, дапытаныя сваякі і суседзі. Прызначаны комплекс судовых экспертыз. Таксама высвятляюцца прычыны і ўмовы, якія спрыялі ўчыненню злачынства.

Другое забойства — 47-гадовай брастаўчанкі — адбылося ўвечары 19 ліпеня. Паведамленне аб яе смерці паступіла ад 19-гадовага сына. Участковаму інспектару міліцыі, які прыбыў па адрасе, ён сказаў, што маці здзейсніла суіцыд з дапамогай рэменя.

У ходзе правядзення судова-медыцынскай экспертызы былі атрыманы дадзеныя аб тым, што гібель наступіла ў выніку асфіксіі, аднак насіла крымінальны характар. У рамках разбору малады чалавек прызнаўся, што задушыў жанчыну падчас сваркі. 24 ліпеня ён быў змешчаны пад варту. Расследаванне крымінальнай справы працягваецца.

Марына Носава, БелаПАН
Мінск, 25 ліпеня 2017