Удзельнікі выязнога пасяджэння на чале з міністрам інфармацыі Уладзімірам Пярцовым наведалі адно са знакавых месцаў абласнога цэнтра - помнік ахвярам фашызму, якія загінулі ў лагеры для ваеннапалонных і мірных грамадзян "5-ы полк" (Шталаг-313).

Гэты лагер дзейнічаў ад пачатку акупацыі і да вызвалення Віцебска ад варожых войскаў. За 1941-1944 гады праз Шталаг-313 прайшлі больш за 100 тыс. чалавек. Амаль 80 тыс. беларусаў былі пахаваны тут у сотнях магіл. Калі савецкія войскі занялі горад, у канцлагеры заставалася ў жывых крыху больш за сотню чалавек.

Аб зверствах фашыстаў у лагеры "5-ы полк" сведчаць успаміны выжыўшых вязняў. З-за холаду, голаду, страшных масавых хвароб штодзень паміралі па 20-30 чалавек. Тут не было вялізных печаў для спальвання целаў, таму трупы скідвалі ў ямы-магільнікі. Калі пасля вайны сталі раскопваць гэтыя пахаванні, у іх знаходзілі астанкі байцоў Чырвонай Арміі і мірных жыхароў, якія ляжалі ў некалькі слаёў. Пры адступленні немцы выкарыстоўвалі палонных як жывы шчыт, вывозілі хворых у іншыя раёны, каб распаўсюдзіць тыф сярод насельніцтва і салдат савецкіх войскаў.

Памяць аб ахвярах фашызму не згасае ў сэрцах нашчадкаў. Удзельнікі выязнога пасяджэння калегіі Мінінфарма ўсклалі вянкі і кветкі да манумента ў знак смутку і ўшанавалі загінулых хвілінай маўчання.

1 снежня 2023, Віцебск
Алеся Пушнякова - БЕЛТА