Новы залеж нафты выяўлены ў Хойніцкім і Рэчыцкім раёнах Гомельскай вобласці, паведамляе дзяржкампанія "Беларуснафта".

"Выявіць залеж дапамагла пошукавая свідравіна 9001s3. Яе прасвідравалі для даразведкі ўжо адкрытага ў 2022 годзе міжсолевага залежу", - растлумачылі ў кампаніі.

Аб’ём двух згаданых пакладаў нафты ацэньваецца прыкладна ў мільён тон. Аб адкрыцці папярэдняга радовішча паведамляла ў сакавіку 2022 года прэс-служба беларускага ўрада.

Паводле звестак "Беларуснафты", у мінулым 2023 годзе здабыча ў краіне павінна была скласці 1,85 млн тон. Усяго ў Беларусі выкарыстоўваецца 52 радовішчы нафты і газу. У рэспубліцы налічваецца звыш тысячы свідравін. Прамысловая здабыча вядзецца з 1965 года, у асноўным у Прыпяцкім прагіне, які размешчаны ў Гомельскай і Магілёўскай абласцях.

За гэтыя гады ў Беларусі здабылі больш за 142 млн тон нафты і звыш 16 млрд кубаметраў спадарожнага нафтавага газу. Пры гэтым у краіне ёсць два НПЗ у Мазыры і Наваполацку, якія здольныя штогод перапрацоўваць больш за 20 млн тон.

У 2021 годзе, размаўляючы з генеральным дырэктарам "Беларуснафты" Аляксандрам Ляхавым, прэзідэнт Беларусі Аляксандр Лукашэнка не выключыў, што краіна можа нарасціць аб’ёмы здабычы нафты на сваёй тэрыторыі да 3-3,5 млн тон у год.

Мінск, 3 студзеня 2024
Sputnik