Большасць насельніцтва Беларусі па-ранейшаму падтрымлівае захаванне ў краіне смяротнай кары, заявіў намеснік міністра замежных спраў Валянцін Рыбакоў на міжнароднай канферэнцыі "Смяротнае пакаранне: пераадоленне рознагалоссяў", якая праходзіць 10 сакавіка ў Мінску.

"Як усім нам добра вядома, большасць беларускіх грамадзян на рэферэндуме 1996 года выказалася за захаванне смяротнага пакарання. І неаднаразовыя сацыялагічныя апытанні, якія праводзіліся, сведчаць пра тое, што смяротнае пакаранне па-ранейшаму па-рознаму ўспрымаецца ў грамадстве і па-ранейшаму маецца большасць прыхільнікаў яго захавання. Намі гэты факт ігнаравацца не можа і не будзе, у тым ліку і ў кантэксце нашага дыялогу з нашымі вельмішаноўнымі еўрапейскімі партнёрамі", — заявіў Рыбакоў.

Ён нагадаў, што ў айчынным заканадаўстве замацаваны часовы характар прымянення смяротнай кары, і адзначыў, што ў краіне пры ўжыванні пакаранняў дзейнічаюць больш жорсткія абмежаванні, чым устаноўленыя для смяротнага пакарання ў Міжнародным пакце аб грамадзянскіх і палітычных правах.

"Наша краіна займае на міжнароднай арэне ўзважаную пазіцыю па пытанні прымянення смяротнай кары. Пры разглядзе Генасамблеяй ААН пытання пра мараторый на смяротную кару мы традыцыйна ўстрымліваемся пры галасаванні", — сказаў Рыбакоў.

Намеснік міністра адзначыў, што Беларусь гатова абмяркоўваць пытанні смяротнага пакарання, але "рашэнне любых праблем варта шукаць не ў плоскасці канфрантацыі, а шляхам паважлівага дыялогу, улічваючы асаблівасці і нацыянальныя інтарэсы краіны".

Канферэнцыя арганізаваная прадстаўніцтвам ААН у Беларусі пры фінансавай падтрымцы пасольства Вялікабрытаніі. Сярод удзельнікаў мерапрыемства — спецпрадстаўнік ЕС па правах чалавека Стаўрас Ламбрынідзіс, спецдакладчык Парламенцкай асамблеі Савета Еўропы па сітуацыі ў Беларусі Андрэа Рыгоні, старшыня камітэта па замежных справах Палаты дэпутатаў Чэхіі Карал Шварцэнберг, пасол Вялікабрытаніі ў Беларусі Фіёна Гіб, прадстаўнік ПРААН у Беларусі Санака Самарасінха і шэраг замежных экспертаў.

Беларусь застаецца адзінай краінай у Еўропе, дзе да гэтага часу ўжываецца смяротнае пакаранне. З гэтай прычыны Беларусь таксама з`яўляецца адзінай еўрапейскай краінай, якая не ўваходзіць у Савет Еўропы. За ўсю гісторыю незалежнай Беларусі было вынесена 406 смяротных прысудаў, прычым два апошнія — з пачатку 2016 года. Адзін з іх быў вынесены 15 лютага, у дзень зняцця Еўрасаюзам санкцыяў у дачыненні да Беларусі, нягледзячы на тое што ў рашэнні Савета ЕС аб зняцці санкцый асобным радком гаворыцца пра неабходнасць увядзення мараторыя на смяротную кару як першага кроку да яе поўнай адмены.

Аляксей Аляксандраў, БелаПАН
Мінск, 10 сакавіка 2016