Актыўнае зніжэнне цэн на другасным рынку жылля, якое доўжылася ўсё першае паўгоддзе 2015 года, у ліпені спынілася.

"Павышаная актыўнасць пакупнікоў не толькі прывяла да стабілізацыі цэн, але і паўплывала на зніжэнне аб`ёму прапановы на рынку другаснага жылля. Лік зарэгістраваных здзелак пераходу права ўласнасці на кватэры ў чэрвені—ліпені 2015 года на 20% перавысіў аналагічны паказчык мінулага года. А колькасць здзелак з кватэрамі супастаўная са стабільным летам 2013 года", — адзначыла эксперт. 

Паводле яе слоў, асаблівасцю цяперашняга лета з`яўляецца рост ліку здзелак і павелічэнне пакупніцкай актыўнасці, нягледзячы на сезон адпачынкаў. Гэта абумоўленае шмат у чым вялікім аб`ёмам адкладзенага попыту, лічыць эксперт. "Зрэшты, прапанова кватэр на рынку па-ранейшаму значна перавышае попыт, таму аб`ектыўных перадумоў для росту цэн на жыллё не назіраецца. На гэты факт трэба звяртаць увагу прадаўцам, выстаўляючы кватэры па цане, максімальна набліжанай да рынкавай.

Калі цана вызначаная правільна, то тэрміны экспазіцыі кватэры скарачаюцца да мінімуму, а торг складае 500-1.000 долараў", — адзначыла Паўлоўская.

Яна таксама лічыць, што актывізацыя попыту на рынку шмат у чым абумоўленая і досыць вялікай колькасцю іншагародніх пакупнікоў. Такія пакупнікі аддаюць перавагу недарагому жыллю. Як правіла, гэта аднапакаёвыя кватэры стандартных спажывецкіх якасцяў ці двухпакаёвыя "брэжнеўкі" за 45—50 тыс. долараў. "Цікавы рынак і для тых, хто прадае аднапакаёвую кватэру і ўзамен купляе двухпакаёвую ці невялікую трохпакаёвую кватэру. Даплата на рынку, які падае, мінімальная. Нядрэнным попытам карыстаюцца кватэры ў гатовых новабудоўлях. Напрыклад, кватэры ў каркасных дамах у спальных раёнах прадаюцца па 1.300-1.400 долараў за квадратны метр", — адзначыла спецыяліст. 

Сярэдні кошт квадратнага метра кватэр стандартных спажывецкіх якасцяў у ліпені склаў 1.310 долараў, у прыватнасці: аднапакаёвыя — 1.380, двухпакаёвыя — 1.270, трохпакаёвыя — 1.205. Пры гэтым 50% ад усяго ліку здзелак прыпадае на аднапакаёвыя кватэры, якія з`яўляюцца самымі дарагімі на рынку, рэзюмавала вядучы эканаміст.

Марына Носава, БелаПАН
Мінск, 14 жніўня 2015