У пагранічнай зоне ў населеным пункце Абяроўшчына Камянецкага раёна 29 ліпеня пагранічны нарад затрымаў грамадзяніна Калумбіі. Выхадзец з Паўднёвай Амерыкі не змог прад`явіць дакументы, якія даюць права ўезду, знаходжання і перамяшчэння на рэжымнай тэрыторыі. 

Пры сабе ў замежнага грамадзяніна быў наўтбук, мабільны тэлефон, фотаапарат, штатыў да яго, 200 долараў ЗША, асабістыя рэчы. 

Вандроўца першапачаткова дабраўся з Мінска да Брэста, далей — у раён пункта пропуску "Пясчатка". Канчатковай мэтай яго маршруту былі еўрапейскія краіны. Намеру незаконна пераходзіць мяжу ў замежнага грамадзяніна не было. 

У выніку ён прызнаны парушальнікам пагранічнага рэжыму і правілаў знаходжання на тэрыторыі Рэспублікі Беларусь. Калумбійцу вынесена спагнанне ў выглядзе папярэджання з забаронай уезду ў краіну на працягу 5 гадоў.

Вячаслаў Будкевіч, БелаПАН
Мінск, 31 ліпеня 2015