У прыватнасці, вывучаецца магчымасць будаўніцтва беларускім бокам для малдаўскіх аграрыяў малочнай фермы і падпісання доўгатэрміновых пагадненняў на пастаўкі ўгнаенняў і сельгастэхнікі, перадае NOI.md.

Як паведамілі ў Мінсельгасе Малдовы, аб гэтым гаварылася ў ходзе сустрэчы, якую правялі міністр сельскай гаспадаркі і харчовай прамысловасці Малдовы Іон Сула і пасол Беларусі ў Малдове Сяргей Чычук. Бакі высока ацанілі супрацоўніцтва дзвюх краін, у тым ліку ў аграхарчовай сферы, і выказалі ўзаемную зацікаўленасць у развіцці традыцыйных адносінаў. Яны таксама абмеркавалі ход рэалізацыі палажэнняў пратакола, падпісанага прэзідэнтамі Малдовы і Беларусі ў межах візіту ў Кішынёў Аляксандра Лукашэнкі 24—25 верасня 2014 года.

Кіраўнік Мінсельгаса Малдовы абазначыў асноўныя галіны, у якіх адзначана актыўнае супрацоўніцтва, выказаўшы зацікаўленасць малдаўскага боку ў пашырэнні ўзаемадзеяння ў тых сектарах, у якіх сельгасвытворцы Беларусі дабіліся найбольшага прагрэсу. У прыватнасці, ён звярнуўся да беларускага дыпламата з просьбай аб арганізацыі візіту ў Беларусь дэлегацыі малдаўскіх фермераў для пазычання імі вопыту беларускіх аграрыяў у сферы жывёлагадоўлі. Акрамя таго, Іон Сула выказаў зацікаўленасць Малдовы ў імпарце з Беларусі сельгастэхнікі, добра вядомай у краіне, якая шырока выкарыстоўваецца сельгасвытворцамі.

Міністр таксама падзякаваў беларускаму боку за арганізацыю гандлёвай місіі ў Мінск малдаўскіх вытворцаў і экспарцёраў сталовага вінаграду. У межах гэтай паездкі малдаўскія вытворцы сустрэліся з 15 прадстаўнікамі найбуйнейшых дыстрыб`ютарскіх гандлёвых сетак Беларусі, уключаючы дзяржаўную сетку "Белкаапгандаль", а таксама з прадстаўнікамі Міністэрства гандлю і Беларускай ГПП. Малдова спадзяецца на павелічэнне экспарту сталовага вінаграду на рынак Беларусі.

У сваю чаргу Сяргей Чычук заявіў, што Беларусь выступае за далейшае ўмацаванне гандлёва-эканамічных адносінаў з Малдовай, адзначыўшы, што для гэтага няма ніякіх бар`ераў. Ён пацвердзіў гатоўнасць беларускага пасольства садзейнічаць развіццю супрацоўніцтва дзвюх краін у галіне сельскай гаспадаркі.

Чычук падкрэсліў важнасць заключэння доўгатэрміновых двухбаковых пагадненняў, якія гарантуюць пастаўкі ў Малдову ўгнаенняў з Беларусі, а таксама пастаўкі малдаўскім фермерам сельгастэхнікі і абсталявання. Пасол паведаміў аб вывучэнні магчымасці будаўніцтва ў Малдове малочнай фермы.

Па выніках сустрэчы было прынята рашэнне, што ўсе абазначаныя пытанні будуць абмяркоўвацца дэталёва на найбліжэйшым пасяджэнні малдаўска-беларускай змяшанай міжурадавай камісіі па гандлёва-эканамічным супрацоўніцтве і будуць зафіксаваны ў яго выніковым пратаколе.

Вячаслаў Будкевіч, БелаПАН
Мінск, 31 мая 2015