Падчас правядзення акцыі незабыўную атмасферу сцімпанка ствараюць супольнасць Steampunker.by, каманда гродзенскіх аніматараў "Маскарад", музыканты Сяргей Пукст, Вольга Акуліч, дзіджэй Містар Калапс, Сяргей Барысевіч і яго "робаталялька" (Гомель), паравая лялька Ірс і жывыя скульптуры.

Падчас дзеяння "Ноч у стылі сцімпанк" прайшлі:

*інтэрактыўнае шоу "Зомбафікацыя" — нанясенне пластычнага грыму на твар добраахвотніка з публікі, прэзентаванае ў выглядзе медыцынскай аперацыі;

*майстар-клас "Як навучыць зомбі-дварэцкага" — гульня з публікай пры ўдзеле раней загрыміраванага добраахвотніка;

*цір кідальнай зброі: дартс, сарбакан, арбалет;

*інтэрактыўная гульня "Расследаванне" — удзельнікі па газетных фатаграфіях і артыкулах прапаноўваюць свае версіі падзей, якія адбыліся.

Дзмітрый Ціханенка, аўтар прадметаў у стылі сцімпанк: "Гэта віктарыянская эпоха. Калі коратка сказаць, гэта часы Шэрлака Холмса — канец ХІХ — пачатак ХХ стагоддзя. Калі развіваліся паравыя машыны, не было пластыку, усё было натуральнае: медзь, бронза, латунь, дрэва". 

Наталля Шаранговіч, дырэктар Цэнтра сучасных мастацтваў: "Для нас гэта першая спроба зрабіць "Ноч музеяў". Вырашылі зрабіць у стылі сцімпанк — цудоўны кірунак у мастацтве. Ён узнік у канцы мінулага стагоддзя. Мастакі спрабавалі нейкім чынам асэнсаваць будучыню і разам з тым вярнуцца ў мінулае. Спалучэнне віктарыянскай эпохі і фэнтэзі нараджае кірунак сцімпанк".

БелаПАН
Мінск, 16 траўня 2015