«У Ашмянскім і Астравецкім раёнах створаны ўсе ўмовы для працы. Звароты грамадзян будуць заўсёды. Галоўнае прызначэнне дзяржаўных структур — своечасовае і аператыўнае іх вырашэнне, прычым рознымі спосабамі, няхай гэта будзе асабістыя прыёмы, прамыя тэлефонныя лініі, праца службы «Адно акно», — сказаў кіраўнік ведамства.

Паездка была запланавана ў тым ліку для вывучэння ступені ўзаемадзеяння паміж структурамі, падпарадкаванымі Міністэрству юстыцыі, і органамі выканаўчай улады.

Міністр азнаёміўся з дзейнасцю органаў і арганізацый рэгіёну, якія ўваходзяць у сістэму ведамства. У прыватнасці, пагутарыў з натарыусамі натарыяльнай канторы і адвакатамі юрыдычнай кансультацыі, спецыялістамі службы «Адно акно», ЗАГСа Астравецкага райвыканкама. Кіраўнік ведамства растлумачыў, што гэта планавы візіт, падчас якога вывучаецца таксама рэалізацыя патрабаванняў кіраўніка дзяржавы і ўрада.

«Асаблівая ўвага надаецца Дырэктыве № 2 аб дэбюракратызацыі і ролі органаў прымусовага выканання, натарыята, адвакатуры, службы „Адно акно“ ў стварэнні спрыяльных умоў для нашых грамадзян», — удакладніў Сяргей Хаменка.

Астравец, на думку міністра, адказвае ўсім запытам прафесіяналаў, якія працуюць на АЭС, а таксама тых, хто забяспечвае жыццядзейнасць горада. Гэты населены пункт у Гродзенскай вобласці «можа быць узорам для многіх гарадоў нашай любімай Радзімы», адзначыў ён.

Звязда, 27 жніўня 2023