Камітэт дзяржбяспекі Беларусі выключыў з Пераліку арганізацый і фізічных асоб, якія маюць дачыненне да тэрарыстычнай дзейнасці, Рамана Пратасевіча і Сафію Сапегу.

Пратасевіч быў уключаны ў гэты спісак адным з першых з грамадзян Беларусі, да гэтага ў яго ўключалі толькі замежнікаў, якія знаходзяцца ў вышуку або асуджаны за злачынствы тэрарыстычнай накіраванасці.

Сапега была ўключана ў тэрарыстычны спісак КДБ, калі прыгавор у дачыненні да яе набыў законную моц.

Нядаўна беларускі прэзідэнт Аляксандр Лукашэнка памілаваў Пратасевіча, а праз нейкі час Сапегу.

Як раней паведамляла агенцтва, былы галоўрэд Telegram-канала NEXTA (прызнаны ў Беларусі экстрэмісцкім і тэрарыстычным) Раман Пратасевіч быў прыгавораны ў Беларусі да васьмі гадоў пазбаўлення волі за шэраг злачынстваў тэрарыстычнай і экстрэмісцкай накіраванасці. Знаходзячыся ў СІЗА КДБ, ён прызнаў віну, заключыў здзелку са следствам, і ўжо падчас судовага следства знаходзіўся пад хатнім арыштам. Праз некалькі дзён пасля ўступлення прыгавору ў сілу ён быў памілаваны кіраўніком дзяржавы.

Грамадзянка Расіі Сафія Сапега была прыгаворана ў Беларусі да шасці гадоў пазбаўлення волі за тое, што "зліла" асабістыя даныя больш як 200 супрацоўнікаў сілавых структур і журналістаў. Сапега, у адрозненне ад Пратасевіча, некаторы час правяла ў папраўчай калоніі, там яна напісала прашэнне аб памілаванні.

Пратасевіч і Сапега, хоць і былі зняты з аднаго рэйса самалёта, праходзілі па розных крымінальных справах. Пасля памілавання Пратасевіч застаўся ў Беларусі, Сапега, якая з’яўляецца грамадзянкай Расіі, пакінула краіну.

"Тэрарыстычны" спісак КДБ знаходзіцца ў адкрытым доступе і ўвесь час абнаўляецца. Да 2020 года ў ім былі грамадзяне такіх краін, як Ірак, Йемен, Нігерыя, якія аб’яўлены міжнароднай паліцыяй у вышук за дачыненне да тэрарызму.

Пасля падзей 2020 года ў яго сталі ўключаць грамадзян Беларусі, у дачыненні да якіх або ўступілі прыгаворы за экстрэмісцкія ці тэрарыстычныя злачынствы, або яны знаходзяцца ў вышуку за гэтыя злачынствы. Цяпер у гэтым спіску каля 200 грамадзян Беларусі.

Першымі з грамадзян Беларусі ў гэты спісак былі ўключаны Раман Пратасевіч і Сцяпан Пуціла, адміністратары прызнанай у Беларусі тэрарыстычнай структуры NEXTA.

Мінск, 13 ліпеня 2023
Sputnik