Тыя, хто тэлефанаваў, папярэдзілі, што праводзіцца «спецаперацыя» і пенсіянерка будзе ў ёй выступаць у ролі «жыўца». Таксама жанчыне пагражалі прыцягненнем да адказнасці ў выпадку, калі яна раскажа каму-небудзь пра свой удзел у злове злачынцы. Як паведамляе ГУУС Мінгарвыканкама, выкарыстоўваючы псіхалагічнае ўздзеянне і маніпуляцыі, ашуканцы прымусілі пажылую мінчанку прытрымлівацца іх інструкцый. Жанчына ўстанавіла на тэлефон праграму, даўшы зламыснікам доступ да яе асабістай інфармацыі.

Пасля гэтага аферысты прапанавалі засцерагчы ўсе наяўныя ў сям’і мінчанкі зберажэнні. Жанчына і яе 90-гадовы муж адкрылі ў банку рахункі і перавялі на іх усе свае назапашванні ў суме амаль 150 тысяч рублёў, якія пазней былі спісаны ашуканцамі.

Акрамя таго, аферысты запатрабавалі ад пенсіянеркі прадаць кватэру, бо яна знаходзіцца ў «чорным спісе». Жанчына зноў паверыла, выставіла жыллё на продаж і нават заключыла папярэднюю дамову.

Выратавала мінчанку знаёмая, якую тая сустрэла ў паліклініцы. Прыяцелька, пачуўшы аб «спецаперацыі», распавяла пенсіянерцы, што ведае са СМІ аб такой схеме махлярства. Пацярпелая зразумела, што стала ахвярай аферыстаў, скасавала дамову на продаж кватэры і звярнулася ў міліцыю.

Сяргей Расолька
Звязда, 21 жніўня 2023