А вы ведаеце, у гэты дзень у 1912 годзе быў здзейснены першы пасажырскі пералёт цераз Ла-Манш? Якія яшчэ падзеі адбыліся 4 жніўня і чым адзначаны гэты дзень у народным календары, чытайце далей:

У 1392 годзе было падпісана Востраўскае пагадненне, у выніку якога скончылася грамадзянская вайна ў Вялікім Княстве Літоўскім.

У 1579 годзе пачалася аблога Полацка войскамі Рэчы Паспалітай на чале са Стэфанам Баторыям.

У 1651 годзе Януш Радзівіл на чале войска ВКЛ узяў Кіеў.

У 1945 годзе былі заснаваныя філіялы Літаратурнага музея Янкі Купалы ў Вязынцы і Ляўках.

1917 год: Янка Брыль, беларускі пісьменнік.

1947 год, Мікалай Селяшчук, беларускі мастак.

Таксама ў гэты дзень нарадзіліся англійскі паэт Персі Бішы Шэлі, амерыканскі джазмен Луі Армстранг і 44-ы прэзідэнт ЗША Барак Абама.

Гэты дзень носіць імя хрысціянскай святой Марыі Магдалены. Яна была першай евангелісткай, нароўне з 12 вучнямі Хрыста, таму з`яўляецца раўнаапостальнай. Разам з маці Выратавальніка яна аплаквала яго пакуты ля крыжа, і ён з`явіўся да яе пасля ўваскрэсення. Марыя Магдалена таксама лічыцца заступніцай дзяўчынак-сірот.

У народзе казалі: "Магдалена — вады па калена", "На Марыю вялікія росы — будзе лён шэры і косы". Раніцай на Магдалену сцялілі лён па роснай траве. Калі быў халодны туман, гэта сведчыла пра тое, што зіма прыйдзе рана і будзе марознай.

Гэты дзень лічыўся вольным ад палявых прац, бо верылі, што калі выйсці ў поле, маланкай можа забіць. Калі сапраўды была навальніца, казалі, што сена будзе "за вочы".

Але гэта не значыць, што нашыя продкі ўвогуле нічога не рабілі на Магдалену. Гэты прысвятак яшчэ называлі Марыя Ягадніца. Узяўшы кошыкі, жанчыны ішлі ў лес па чарніцы, маліны, парэчкі, прымаўлялі: "У лес іду – пуста, з лесу – густа".

Sputnik, 4 жніўня 2023