Акцыя на плошчы Незалежнасці з самага пачатку насіла правакацыйны характар. Яе арганізатары, якія павялі сваіх прыхільнікаў на штурм Дома ўрада, не маглі не ведаць пра наступствы. Журналісты, якія выконвалі свой прафесійны абавязак і асвятлялі гэтыя падзеі, апынуліся ў акружэнні звар`яцелага натоўпу. Так званыя лідары апазіцыі, у тым ліку кандыдаты ў Прэзідэнты Рэспублікі Беларусь, якія знаходзіліся на плошчы, паводле нашых звестак, не зрабілі ніякіх крокаў, каб засцерагчы ад небяспекі дзейнасць прадстаўнікоў сродкаў масавай інфармацыі. Падобныя паводзіны несумяшчальныя з нормамі сучаснага цывілізаванага палітычнага жыцця. Звяртаем увагу, што, паводле слоў саміх пацярпелых, супрацоўнікі праваахоўных органаў дзейнічалі строга ў рамках закона. Агрэсію праяўлялі менавіта ўдзельнікі беспарадкаў.

ГА "БСЖ" патрабуе расследавання ўсіх выпадкаў гвалту супраць журналістаў і прыцягнення вінаватых да адказнасці.

21 снежня 2010
Звязда