У Гродне пачалі рыхтаваць пакет дакументаў і мерапрыемстваў, якія неабходны, каб уключыць у спісак ЮНЕСКА Каложскую царкву – адзін са старэйшых праваслаўных храмаў Беларусі.

Аб тым, што пачалося абмеркаванне ўключэння Каложскай царквы ў спісак сусветнай спадчыны ЮНЕСКА, паведамляе прэс-служба Гродзенскай праваслаўнай епархіі. Пачатак гэтаму паклала сустрэча настаяцеля Барысаглебскага (Каложскага) храма XII стагоддзя протаіерэя Аляксандра Балоннікава з прадстаўнікамі навуковай супольнасці Беларусі з Акадэміі навук і інстытута "Гроднаграмадзянпраект".

Навукоўцы прыбылі ў Гродна, каб пачаць збор матэрыялу і візуальна агледзець Каложскую царкву для падрыхтоўкі намінацыйнага дасье. У дакуменце распрацоўваецца план кіравання аб’ектам. Ён павінен забяспечыць захаванасць гістарычнага помніка і яго каштоўнасцей.

Менавіта гэтая працэдура неабходна для ўключэння Каложы ў спісак сусветнай спадчыны ЮНЕСКА.

Каложская царква ў Гродне была пабудавана ў канцы XII стагоддзя. Мур сцен выкананы з валуноў і плінфы – абпаленай глінянай цэглы. У сцены ўмураваны гліняныя збаны-гласнікі, якія паляпшаюць акустыку.

У другой палове XIX стагоддзя частка заходняй сцяны і ўся паўднёвая разбурыліся – з’ехалі разам з схілам гары, які часткова абрынуўся. Паўднёвую каменную сцяну замянілі на драўляную, якая праслужыла больш за сто гадоў.

У 2018 годзе ў Каложы правялі капрамонт – замянілі струхлелую сцяну і правялі важныя работы ўнутры храма. Пасля абнаўлення царква стала цяплейшай, а новая афарбоўка сцяны стала больш гарманічна глядзецца на фоне старадаўняга цаглянага мура.

Каложа лічыцца адным з самых старых дзеючых храмаў краіны, ахоўваецца дзяржавай як помнік архітэктуры нулявой (самай вышэйшай) катэгорыі. У 2004 годзе храм быў уключаны ў лік кандыдатаў на ўнясенне ў спісак сусветнай спадчыны ЮНЕСКА.

Гродна, 23 красавіка 2023
Sputnik, Іна Грышук.