У мерапрыемстве, арганізаваным у двары МЯАД, бралі ўдзел больш як 200 дзяцей, а таксама іх бацькі, бабулі і дзядулі.

У час свята дзеці змаглі даведацца аб жыцці яўрэйскай сям`і ў Іерусаліме, зрабіць унёсак у стварэнне Світка міру, які ўяўляе сабой доўгае папяровае палатно з рознакаляровымі адпячаткамі далонек, а таксама ўзяць удзел у розных спартыўных конкурсах і канцэртным танцавальна-забаўляльным шоу. Да мерапрыемства бацькамі была падрыхтавана фотавыстава "Партрэт сям`і".

У канцы свята кіраўнік беларускага прадстаўніцтва амерыканскага яўрэйскага аб`яднанага размеркавальнага камітэта "Джойнт" Йоні Лейфер і дырэктар яўрэйскага культурнага таварыства "Эмуна" Соф`я Фількова запусцілі ў неба чатырох белых галубоў, што сімвалізуюць мір на планеце.

У інтэрв`ю БелаПАН спецыяліст па яўрэйскай адукацыі МЯАД Ірына Абрамовіч зазначыла, што мерапрыемства падрыхтавана "Эмунай" для яўрэйскіх дзяцей, а таксама навучэнцаў мінскай школы № 51 і сталічных гімназій №№ 6 і 8 — сяброў Мінскага яўрэйскага абшчыннага дома.

Паводле яе слоў, падчас свята быў арганізаваны збор цацак і адзення для дзяцей з сацыяльна неабароненых сем`яў і дзіцячых дамоў. 11 чэрвеня моладзь з "Эмуны" і яўрэйскага студэнцкага культурнага цэнтра "Гілель" адправіцца ў падшэфныя дзіцячыя дамы з сабранымі падарункамі.

Міжнародны дзень абароны дзяцей адзначаецца з 1950 года па рашэнні спецыяльнай сесіі Міжнароднай дэмакратычнай федэрацыі жанчын. Гэты дзень — напамінак дарослым пра адказнасць за будучыню дзяцей, якія маюць патрэбу ў пастаянным клопаце і абароне.

Мінск, 1 чэрвеня.  Марат Гаравы, БелаПАН.

Ссылка на текущий документ: http://belarus.kz/aktueller/2-0/1149/835

Текущая дата: 14.11.2024