У Беларусі ад 15 да 17% сямей маюць праблемы з дзетанараджэннем, паведаміла на прэс-канферэнцыі доктар медыцынскіх навук, прафесар, загадчыца лабараторыі праблем здароўя дзяцей і падлеткаў РНПЦ "Маці і дзіця" Маргарыта Дзевялтоўская.

"Колькасць сямей, якія маюць праблемы з дзетанараджэннем і звяртаюцца па медыцынскую дапамогу, на сённяшні дзень складае ад 15 да 17%. Пры чым долі прычын, якія абцяжарваюць нараджэнне дзіцяці, прыкладна аднолькавыя, гэта значыць прычыны з боку жанчыны і прычыны з боку мужчыны", - распавяла медык.

Паводле яе інфармацыі, у РНПЦ "Маці і дзіця" аказваецца медыцынская дапамога жанчынам, якія маюць самую цяжкую акушэрска-гінекалагічную паталогію, таксама аказваецца дапамога мужчынам, у якіх ёсць праблемы, што прыводзяць да бясплоднасці.

"Аказваецца дапамога немаўлятам, якія нарадзіліся, пачынаючы ад 22 тыдняў, і дзецям, якія з’явіліся на свет з вагой да 1,5 кг. Для выходжвання такіх дзяцей выкарыстоўваюцца клеткавыя тэхналогіі, гэта метады, якія былі распрацаваны намі ўпершыню ў свеце, і мы бачым цудоўныя вынікі. Дзеткі, якія нарадзіліся глыбока неданошанымі, выдатна развіваюцца дзякуючы гэтым тэхналогіям", - адзначыла Дзевялтоўская.

Таксама выкарыстоўваюцца тэхналогіі штучнага інтэлекту для прагназавання развіцця дзяцей, якія нарадзіліся заўчасна.

"Такім чынам, паказчык выжывальнасці дзяцей, якія нарадзіліся з вагой да 1 кг, на сённяшні дзень у краіне перавышае 90%. Гэта рэкордная лічба", - праінфармавала прафесар.

"Пры падтрымцы дзяржавы ажыццяўляюцца бясплатныя працэдуры ЭКА і ў 2023 годзе праведзена ўжо 1 880 цыклаў. За 20 гадоў выкарыстання дапаможных рэпрадуктыўных тэхналогій былі народжаны больш за 10 тыс дзяцей", - паведаміла Дзевялтоўская.

Гэта з’яўляецца важнейшым напрамкам, які ўносіць істотны ўклад у паляпшэнне рэпрадуктыўнага патэнцыялу краіны, адзначыла яна. Найшматдзетным рэгіёнам лічыцца Брэсцкая вобласць, дзе жыве больш за 25 тыс шматдзетных сямей.

Мінск, 14 траўня 2024
Sputnik